මුදල් ගනුදෙනුවක් මුල් කරගනිමින් පදවිය ප්‍රදේශයේ පදිංචි මත්කුඩු ජාවාරමට සම්බන්ධ කාන්තාවක මරාදැමීමට ඩුබායිහි රැඳී සිටින ආමි ප්‍රියන්ත නමැති මත්කුඩු ජාවාරම්කරු විසින් යෙදවූ වෙඩික්කරුවකුට වෙඩිල්ල වැරදී 73 හැවිරිදි කාන්තාවකට වෙඩි තබා මරා දමා ඇති බව එම ඝාතනය සම්බන්ධයෙන් කළ විමර්ශනයේදී හෙළි කරගත් පොලිස් විශේෂ කාර්ය බළකායේ පුල්මුඩේ කඳවුරේ නිලධාරීන් සහ පදවිය පොලීසියේ නිලධාරීන් වෙඩි තැබීමට යොදාගත් ටී56 ගිනි අවියක් සහ පිස්තෝලයක් සමඟ වෙඩික්කරු ඇතුළු තිදෙනකු අත්අඩංගුවට ගැනීමට සමත්ව ඇත. මේ ඝාතනය පසුගිය 5 දා සිදුව ඇති අතර, වෙඩි වැදී මියගොස් ඇත්තේ වෙඩික්කරුගේ ඉලක්කය බවට පත් කාන්තාවගේ මිත්තණිය බව පොලීසිය සඳහන් කරයි.
මෙලෙස ජීවිතක්ෂයට පත්ව ඇත්තේ පදවිය පොලිස් වසමේ අංක 837, ඩී. 13, බාලයාවැව, බෝගහවැව ලිපිනයේ පදිංචි නන්හාමිගේ මුතුමැණිකා නමැති 73 හැවිරිදි කාන්තාවය.
රාත්‍රී 11.40ට පමණ ඩියෝ වර්ගයේ සුදු හා නිල් පැහැති යතුරුපැදියකින් පැමිණි දෙදෙනකු විසින් ටී56 ගිනිඅවියක් යොදාගනිමින් වෙඩි තබා තිබේ.
වෙඩි වැදුණු කාන්තාව අසල්වාසීන් විසින් රෝහල්ගත කර ඇති අතර, ඉකුත් (6) දා දහවල් 01.20 ට පමණ රෝහලේදී ඇය මියගොස් ඇත.
මේ සම්බන්ධයෙන් විමර්ශන පැවැත්වූ විශේෂ කාර්ය බළකායේ වැලිඔය කඳවුරේ නිලධාරීන් කිරිඉබ්බන්වැව පදිංචි පුද්ගලයකු ගිනි අවි දෙක සමඟ අත්අඩංගුවට ගෙන ඇත. සැකකරු වැලිඔය පොලිස් ස්ථානයට භාර දීමෙන් අනතුරුව රැඳවුම් නියෝග මත වැඩිදුර විමර්ශන සිදු කර තිබේ. මේ සැකකරු සම්බන්ධයෙන් පදවිය පොලීසියේ නිලධාරීන් කළ වැඩිදුර විමර්ශනයේදී අනාවරණය වූ කරුණු මත මේ අපරාධය කිරීමට පැමිණි බවට සැක කරන වෙඩික්කරු හා පැදිකරු අපරාධය සඳහා පැමිණි යතුරුපැදියද සමඟ අත්අඩංගුවට ගෙන ඇතැයි පොලිස් මාධ්‍ය කොට්ඨාසය සඳහන් කරයි.
අත්අඩංගුවට ගත් සැකරුවන් වයස අවුරුදු 26 හා 30 යන වයස්වල පසු වන, මහියංගණය හා ඇහැටුගස්වැව ප්‍රදේශවල පදිංචිකරුවන් බවද පොලිස් මාධ්‍ය කොට්ඨාසය සඳහන් කරයි.
පොලිස් විශේෂ කාර්ය බළකා මාධ්‍ය ඒකකය සඳහන් කරන්නේ සොයාගත් T56 ගිනි අවිය මෙට පෙර සිදු වූ මනුෂ්‍ය ඝාතන දෙකක් සඳහාද යොදාගත් අවියක් බව පෙනී යන බවයි. ඒ එක් ඝාතනයකදී යුද හමුදා සෙබළකුද අත්අඩංගුවට ගත් අතර, තවත් ඝාතනයක් සිදු වන්නේ දැනට ඩුබායි සැඟව සිටින සංවිධානාත්මක අපරාධකරුවකු වන වැලිඔය ප්‍රියන්ත නමැත්තාගේ බිරිය සමඟ අනියම් ඇසුරක් පැවැත්වූ තැනැත්තකු වෙඩි තබා ඝාතනය කිරීම බව පොලිස් විශේෂ කාර්ය බළකාය සඳහන් කළේය. වැලිඔය ප්‍රියන්ත නමැත්තා පදවිය ප්‍රදේශයේ හෙරොයින් ජාවාරම කිරීමට කාන්තාවක යොදාගෙන සිට ඇති බවත්, එම කාන්තාව හෙරොයින් ගෙන මුදල් නොදීම හේතුවෙන් එම කාන්තාව ඝාතනය කිරීම සඳහා සැකකරුවන්ට කොන්ත්‍රාත්තුව දී ඇති බවට විමර්ශනවලින් තොරතුරු හෙළ විණැයි පොලීසිය කියයි.
විශේෂ කාර්ය බළකා අණ දෙන නිලධාරි ජ්‍යෙෂ්ඨ නියෝජ්‍ය පොලිස්පති නීතිඥ වරුණ ජයසුන්දර මහතාගේ නියෝග හා උපදෙස් පරිදි, වව්නියාව කලාප අණ දෙන නිලධාරී පොලිස් අධිකාරී කොඩිතුවක්කු මහතාගේ මෙහෙයවීමෙන්,
සහකාර පොලිස් අධිකාරි දයාරත්න මහතාගේ අධීක්ෂණයෙන්, විශේෂ කාර්ය බළකා පුල්මුඩේ කඳවුරේ කදවුරු අණ දෙන නිලධාරී පොලිස් පරීක්ෂක කුලතුංග ඇතුළු නිලධාරීන් කණ්ඩායමක් විමර්ශන පවත්වා ඇති අතර, කැබතිගොල්ලෑව පොලීසියේ ස්ථානාධිපති ප්‍රධාන පොලිස් පරීක්ෂක විජය කුමාරසිරි මහතා ඇතුළු නිලධාරීහු සිද්ධිය සම්බන්ධයෙන් වැඩිදුර විමර්ශන පවත්වති.
(කැබතිගොල්ලෑව - එස්.ජී. උබේපාල)
0 Comments