ජනපති අරමුදල මන්ත්‍රීලා 36කට පිටපාරෙන් කෝටි ගණනක් දීලා

මූලික අරමුණු වලින් බැහැරව හිටපු පාර්ලිමේන්තු මන්ත්‍රීවරුන් 36 දෙනකුට ජනාධිපති අරමුදලෙන් 2005-2024 කාල සීමාවේදී රුපියල් කෝටි ගණනින් මුදල් ලබා දී ඇතැයි ආණ්ඩු පක්ෂයේ ප්‍රධාන සංවිධායක අමාත්‍ය වෛද්‍ය නලින්ද ජයතිස්ස මහතා පාර්ලිමේන්තුවේදී ඊයේ (17) පැවසීය.මෙයින් වැඩිම මුදල ලබා දී තිබුණේ හිටපු අග්‍රාමාත්‍ය දි.මු. ජයරත්න මහතාට බවත් ඔහුට රුපියල් කෝටි තුනක මුදලක් දී තිබූ බවත් අමාත්‍යවරයා කීවේය.


මේ අතර අග්‍රාමාත්‍ය වෛද්‍ය ඒකකය වෙනුවෙන් 2022-2024 කාල සීමාවේදී රුපියල් එක්කෝටි විසි එක් ලක්ෂයක මුදලක් වැය කර ඇතැයි පැවසූ ජයතිස්ස මහතා වර්තමාන අග්‍රාමාත්‍යවරිය බලයට පත්වීමෙන් පසු ගිලන් රථ බාරදී එම වියදම් කපා හැරිය බවද ප්‍රකාශ කළේය.ඔහු මෙසේ පැවසුවේ පාසල් දරුවන්ගේ ලිපි ද්‍රව්‍ය වියදම් පිළිබඳ පරිපූරක ඇස්තමේන්තු විවාදයේදීය.නලින්ද ජයතිස්ස මහතා මෙසේද පැවසීය.


දරිද්‍රතාවට පිළියමක් ලෙසත් අධ්‍යාපනික අවශ්‍යතා සඳහාත් ආගමික වත් පිළිවෙත් සඳහාත්, ජාතිය වෙනුවෙන් සේවය කළ අය සඳහාත් තමයි ජනාධිපති අරමුදලෙන් මුදල් වෙන් කරන්න පුළුවන්. ඒවා තමයි එම අරමුදලේ අරමුණ. නමුත් ඒ අරමුදලේ අරමුණෙන් බැහැරව වෙනත් වෙනත් පුද්ගලයන්ට මුදල් දීලා තියෙනවා. 2005-2024 කාල සීමාවේදී ජනාධිපති අරමුදලින් වෙන් කරන ලද ගෙවීම් සම්බන්ධයෙන් සම්බන්ධ තොරතුරු මගේ ළග තියෙනවා. ජනාධිපති අරමුදලෙන් ආධාර ලබාගත් කට්ටිය මෙන්න. පී හැරිසන්, පියසේන ගමගේ, සුමේධා ජයසේන මනෝජ් සිරිසේන. පී. දයාරත්න, එස්.සී. මුතුකුමාරණ, වාසුදේව නානායක්කාර, සරත් අමුණුගම, එස්.බී. නාවින්න යන හිටපු මන්ත්‍රීවරුන් මෙසේ ජනාධිපති අරමුදලින් මුදල් අරගෙන

තියෙනවා. තවත් නම් ටිකක් තියෙනවා හොයාගන්න ටිකක් අමාරුයි. එක්කෙනෙක් ජේ.පී.ඩී.කේ. ජයසේකර එතන තියෙන්නේ කුරුණෑගල හිටපු මන්ත්‍රී කියල. කුරුණෑගලින් ආපු ජේ.පී.ඩී.කේ. ජයසේකර කවුද. අපි දන්න එක ජයසේකර කෙනයි ඉන්නේ. කවුද ඒ (සෙසු මන්ත්‍රීවරු දයාසිරි ජයසේකර යනුවෙන් හඬ නගති)


කළුතර දිස්ත්‍රික්කයේ එච්.පී.එන්.ඩී. සිල්වා. මෙහෙම නමක් ඡන්ද ව්‍යාපාරයේ තිබුණේ නෑ. හැබැයි පියල් නිශාන්ත ද සිල්වා නම් තිබ්බා.

එයා තමයි මේ. එස්.ඒ.ඩී. ප්‍රේමජයන්ත ගෙදර ලිපිනය නුගේගොඩ. කොළඹ දිස්ත්‍රික් මන්ත්‍රී සුසිල් ප්‍රේම ජයන්ත, ඔව්. මේ නම ටිකක් හොයාගන්න අමාරු වුණා. ඊ.ඊ.අයි.ඩී.ඩී. පෙරේරා බස්නාහිර පළාත් සභාවේ හිටපු මහ ඇමැති ඉසුර දේවප්‍රිය ධර්මසේන පෙරේරා, එස්.ඒ. ජගත් කුමාර ලක්ෂ දහයයි. කේ.පී. එස්. කුමාරසිරි නම ලක්ෂ පනස් තුන්දහසයි.ජයලත් ජයවර්ධන ලක්ෂ දහයයි. නාමල් ගුණවර්ධන ලක්ෂ දහයයි.


ධර්මදාස බණ්ඩා ලක්ෂ දහයයි. වීදුර වික්‍රමනායක ලක්ෂ පහළොවයි. විමලවීර දිසානායක ලක්ෂ තිහයි. ලකී ජයවර්ධන ලක්ෂ 16යි. පී. චන්ද්‍රසේකරන් ලක්ෂ දාහතරයි. ජෝන් අමරතුංග ලක්ෂ 40යි. ජෝසප් මයිකල් පෙරේරා ලක්ෂ 27 යි. ටී.බී. ඒකනායක ලක්ෂ 48යි. ඩබ්.එම්.එස්. ෆොන්සේකා ලක්ෂ පනස් පහයි. මේ සරත් ෆොන්සේකා නොවෙයි. ජයන්ත වීරසිංහ ලක්ෂ අනුවයි. මහින්ද රාජපක්ෂ ජනාධිපතිතුමාගේ නීති උපදේශක.

ඇලෙක් අලුවිහාරේ ලක්ෂ විසි දෙකයි. රංජිත් අලුවිහාරේ ලක්ෂ අටයි. අළුවිහාරේ පරම්පරාවම බෙහෙත් අරගෙන තියෙන්නේ ජනාධිපති අරමුදලින්. රාජිත සේනාරත්න කෝටියයි. කෙහෙළිය රඹුක්වැල්ල ලක්ෂ එකසිය දහයයි, එම්.කේ.ඒ.ඩී.එස් ගුණවර්ධන ලක්ෂ එකසිය දොළහයි. රංජිත් සොයිසා ලක්ෂ 188යි. දි.මු ජයරත්න කෝටි තුනයි. මේ ජනාධිපති අරමුදලේ මුදල්. අපේ ගමේ මිනිස්සු ලක්ෂ තුන හතරක් ගන්න කොච්චර මහන්සි වෙනවද. මේවා ලියල තියෙන්නෙ දුප්පත්කම නැති කරන්නද, ඥානය වර්ධනය කරන්නද. මෙහෙම තමයි ජනාධිපති අරමුදල පාවිච්චි කරලා තියෙන්නේ මේ මණ්ඩලයේ සභාපති ජනාධිපති.


මේවා මේ රටේ පාර්ලිමේන්තුව දන්නේ නැහැ ජනතාව දන්නෙත් නැහැ. දරුවන් වෙනුවෙන් වියදම් කරන්න තිබුණු මුදල් මේ. අගමැති කාර්යාලයේ වෛද්‍ය ඒකකයේ වියදම් (2022 සිට 2024 සැප්තැම්බර් දක්වා) එක්කෝටි 21ක් ලක්ෂයක්. අග්‍රාමාත්‍යවරිය ගිලන් රථ භාර දීලා අඩු කරලා තියෙන්නේ මේ වියදම් තමයි. ජනතාවගේ බදු මුදල් තමුන්නාන්සේලා වියදම් කරපු හැටි තමයි මේ. කවුද මේවා පාවිච්චි කළේ දිනේෂ් ගුණවර්ධන. මේවා නතර කරන්න තමයි ජනතාව අපිට බලය දුන්නේ. රටේ සමහර භාණ්ඩවල හිගයක් තියෙනවා.


 

ඔබතුමා ලන්ඩන් විශ්ව විද්‍යාලයකට ගියා කියනවා (සජිත් ප්‍රේමදාස දෙස බලා) ඕන නම් ඒ සහතික ඉදිරිපත් කරන්න පුළුවන්. අශෝක රන්වල ඉවත් වුණේ මේ මොහොතේ උපාධි සහතිකය ඉදිරිපත් කරන්න බැරි වුණ නිසා. උපාධිය නැති නිසා නොවේ. එතුමා ඒක ඉදිරිපත් කරන්න යම් කාලයක් ගන්නවා. මාධ්‍යයෙන් විපක්ෂ නායකතුමාට සමාජ චෝදනාවක් තියෙනවා. හර්ෂ ද සිල්වා මහතාගේ උපාධිය ගැන අද කවුරුත් ප්‍රශ්න කරන්නේ නැනෙ. නමුත් සජිත්ගේ සහතිකය ගැන ප්‍රශ්න කරනවනේ. ඔබතුමා මේක ඉදිරිපත් කළානම් හරි යැයිද කීය.
(අංජුල මහික වීරරත්න)

ජනාධිපති අරමුදලෙන් මේ ආකාරයට ප්‍රතිලාභ ලැබූ පුද්ගලයින්ගේ නම් ලැයිස්තුව:

• පී. හැරිසන්
• පියසේන ගමගේ
• සුමේධා ජයසේන
• මනෝජ් සිරිසේන
• පී. දයාරත්න
• එස්.සී. මුතුකුමාරණ
• වාසුදේව නානායක්කාර
• සරත් අමුණුගම
• එස්.බී. නාවින්න
• දයාසිරි ජයසේකර
• පියල් නිශාන්ත ද සිල්වා
• සුසිල් ප්‍රේමජයන්ත
• ඉසුර දේවප්‍රිය
• එස්.ඒ. ජගත් කුමාර
• කේ.පී.එස්. කුමාරසිරි
• ජයලත් ජයවර්ධන
• නාමල් ගුණවර්ධන
• ධර්මදාස බණ්ඩා
• වීදුර වික්‍රමනායක
• විමලවීර දිසානායක
• ලකී ජයවර්ධන
• පී. චන්ද්‍රසේකරන්
• ජෝන් අමරතුංග
• ජෝසප් මයිකල් පෙරේරා
• ටී.බී. ඒකනායක
• ඩබ්.එම්.එස්. ෆොන්සේකා
• ජයන්ත වීරසිංහ
• ඇලෙක් අලුවිහාරේ
• රංජිත් අලුවිහාරේ
• රාජිත සේනාරත්න
• කෙහෙළිය රඹුක්වැල්ල
• එම්.කේ.ඒ.ඩී.එස්. ගුණවර්ධන
• රංජිත් සොයිසා
• දි.මු. ජයරත්න
  
  
  
  
  ඉහත අයගෙන් වැඩිම මුදල් අගයන් ගත් අය
  
  
  • දිමූ. ජයරත්න මි. 30 යි
  • රංජිත් සොයිසා මි. 18.8 යි
  • M. K. A. D. S. ගුණවර්ධන  මි 11.2
  • කෙහෙළිය රඹුක්වැල්ල මි. 11 යි
  • රාජිත සේනාරත්න මි 10 යි
  • ජයන්ත වීරසිංහ මි. 9 යි
  • ඩබ්ලිව් එම් එස් ෆොන්සේකා මි. 5.5 යි
  • ටී බී ඒකනායක මි. 4.8 යි
  • ජෝන් අමරතුංග  මි 4  යි
  • විමලවීර දිසානායක මි 3 යි
  • ජෝශප් මයිකල් පෙරේරා මි. 2.7 යි
  • ඇලික් අලුවිහාරේ මිලියන 2.2 යි
  • ලකී ජයවර්ධන මි. 1.62 යි
  • විදුර වික්‍රමනායක මි. 1.5 යි
  • එස්.ඒ.ජගත් කුමාර මි 1 යි
  • ජයලත් ජයවර්ධන මි1 යි
  • නාමල් ගුණවර්ධන මි1 යි
  • ධර්මදාස බණ්ඩා මි1 යි
  • පී.චන්දරසේකරන් මි. 1.4 යි
  • K. P. S. කුමාරසිරි  මි 0.9
  • රංජිත් අලුවිහාරේ මිලියන 0.8 යි