සුනාමි බිලිඳා අභිලාෂ් ඊයේ (26) සිය නිවෙසේ ඉදිකර ඇති සුනාමි ස්මාරකය අබියසදී සුනාමි ව්‍යසනයෙන් මියගිය තම ඥාතීන් සිහි කර පුෂ්පෝපහාර දැක්වීය. 2004 වසරේ සුනාමි රළ පහරින් කල්මුණේ උතුරු මූලික රෝහලේ ඒ වන විට ප්‍ර‍තිකාර ලබමින් සිටි ජයරාසා අභිලාෂ් දරුවා 'සුනාමි බේබි 81' නමින් ලොව පුරා කතාබහට ලක්වූයේ මාස දෙකකුත් සතියක් වයසැති බිලිඳකු ලෙස සිටියදීය.
මේ බිලින්දාට මවුවරුන් 09 දෙනකුම අයිතිවාසිකම් කී නිසා එහි ඇති වූ නොසන්සුන්තාව හේතුවෙන් රෝහල් කළමනාකාරීත්වය කල්මුණේ මහේස්ත්‍රාත් අධිකරණයට ඉදිරිපත් කරන ලදි.
ඒ වෙනුවෙන් මවුවරුන් නවදෙනකුගේම ජාන පරීක්‍ෂණයකට භාජන කරන ලෙස විනිසුරුවරයා නියෝග කළේය. ඉන්පසු දින 52කට පසු ජයරාසා සහ යුනිතලා යුවළගේ පුත්‍ර‍යා, අභිලාෂ් බවට ඔප්පු විය.
පසුව අධිකරණයෙන් දරුවා ජයරාසා යුනිතලා යුවළට භාර දෙන ලදි. දැනට මඩකලපුව කුරුක්ලමඩම් ගම්මානයේ වෙසෙන අභිලාෂ් මේ වන විට විසි හැවිරිදි වියේ පසුවෙයි.
(මඩකලපුව ටී.එල්. ජව්ෆර්කාන්)
0 Comments