අපරාධ පරීක්ෂණ දෙපාර්තමේන්තුවේ මූල්‍ය අපරාධ විමර්ශන ඒකකයට පැමිණි හිටපු පාර්ලිමේන්තු මන්ත්‍රී විමල් වීරවංශ මහතා බැසිල් රාජපක්ෂ මහතා සහ ඔහුගේ පවුලේ සාමාජිකයන් සතු අමෙරිකානු දේපළ පිළිබඳව පැය දෙකක පමණ ප්‍රකාශයක් ලබා දී තිබේ.
වීරවංශ මහතා පෙර පෞද්ගලික රූපවාහිනී නාලිකාවක සිදුකළ ප්‍රකාශයකට අදාළව මෙම ප්‍රකාශය ලබාගත් බව සඳහන් කළේය. නීතිඥ උදය ගම්මන්පිල මහතාද මෙම ප්‍රකාශය සටහන් කිරීමේදී සහභාගී වී ඇති අතර, ඔවුන් සතුව තිබූ ඇතැම් ලිඛිත තොරතුරුද පොලිස් නිලධාරීන්ට භාර දී ඇත.
වීරවංශ මහතා වැඩිදුරටත් පැවසූ පරිදි, බැසිල් රාජපක්ෂ මහතා අමෙරිකාවේ රැකියාවක් නොකළද, ඔහු සතුව එරට විශාල ධනයක් ඇති බව ලබාදුන් ලේඛන මගින් පෙන්වා දී ඇත. මෙම දේපළ බැසිල් රාජපක්ෂගේ දුව, බිරිඳ, පුතා සහ බෑනන්ගේ නම්වලින් ලියාපදිංචි කර ඇති බවට තොරතුරු ඇතැයි ප්‍රකාශ කර සිටියේය.
"අපි භාරදුන්න ලිපිලේඛන අනුව නම් අසාමාන්‍ය ධනයක්, මම හිතන්නේ සම්පූර්ණ ධනයනම් වෙන්න බැහැ. ඒ ප්‍රමාණයත් විශාල ධනයක් කියන්න පුළුවන්. බැසිල් රාජපක්ෂ අ‍මරිකාවේ රස්සාවක් කළේ නැහැනේ. ලංකාවේ කරපු රස්සාවෙන් හම්බ කරපු දේවල් වලින්නේ ඇමරිකාවේ තියෙන දේපළ තියෙනවානම් තියෙන්නේ එයාගේ දුවගෙ නමින්, එයාගේ බිරිඳගෙ නමින්,
එයාගෙ නමින්, එයාගේ පුතාගෙ නමින්, එයාලගෙ බෑනලාගේ නමින් තියෙන ඒවා මේකෙ නැහැ. "
"බොරුවට හොරු අල්ලනවා කියලා හාල්මැස්සන් උස්සනවා වෙනුවට, නියම හොරු අල්ලන්න ඕනෑ නම් අමෙරිකා එක්සත් ජනපදයේ බැසිල් රාජපක්ෂගේ දේපළ ටික හරියට හොයලා ගත්තොත් හොරා කවුද කියලා ලංකාවටම ඔප්පු කරලා පෙන්වන්න පුළුවන්," යැයි වීරවංශ මහතා අවධාරණය කළේය.
මෙම ප්‍රකාශය මූලික වශයෙන් මුදල් විශුද්ධිකරණය සම්බන්ධයෙන් පමණක් සිදු කළ බවත්, තවත් දන්නා තොරතුරු ඇති බවත්, පරීක්ෂණ සාධාරණව සිදුවන්නේ නම් ඉදිරියේදී ඒවාද හෙළිදරව් කිරීමට සූදානම් බවත් ඔහු පවසා සිටියේය.
0 Comments