නව වසරේ මුල් දිනයේ ඇමරිකාවේ නිව් ඔලියන්ස් නුවර සිදු වූ දරුණු ත්‍රස්ත ප්‍රහාරයෙන් විලියම් කුමරුගේ හා හැරී කුමරුගේ හිටපු ළදරු රැකවරණ සහායිකාවගේ සොයුරු වන එඩ්වඩ් පෙටිෆර් (31) ඇතුළු පුද්ගලයින් 14 දෙනෙකු මිය ගොස් තිබේ.
ෂම්සුද්-දීන් ජබ්බාර් නම් පුද්ගලයෙකු විසින් බර්බන් වීදියේ සැමරුම් උත්සවයට එක්ව සිටි ජනතාව අතරට කුලී රථයක් පදවාගෙන ගොස් මෙම ප්‍රහාරය සිදු කර තිබුණි. මේ හේතුවෙන් තවත් පුද්ගලයින් 39 දෙනෙකු තුවාල ලබා ඇති අතර, ප්‍රහාරකයා පසුව පොලීසිය සමඟ වූ වෙඩි හුවමාරුවකදී මිය ගොස් තිබේ.
එඩ්වඩ් පෙටිෆර්ගේ සොයුරිය වන ටිගී පෙටිෆර්, 1993 සිට 1999 දක්වා කාලය තුළ විලියම් හා හැරී කුමරුන්ගේ ළදරු රැකවරණ සහායිකාව ලෙස සේවය කර ඇති අතර,
ඇය රාජ පවුල සමඟ සමීප සබඳතා පවත්වා ගෙන තිබේ. ඇය හැරී කුමරුගේ පුත් ආචීගේ දේව මාතාව වන අතර, හැරී කුමරු ද ඇයගේ පුතෙකුගේ දේව පියා වශයෙන් කටයුතු කරයි.
චාල්ස් රජු මෙම සිදුවීම පිළිබඳව දැඩි කනස්සල්ලට පත්ව සිටින අතර, පෙටිෆර් පවුලට පෞද්ගලිකව සිය සානුකම්පිය බව පළ කර ඇත. විලියම් කුමරු හා කේට් කුමරිය ද මෙම සිදුවීම පිළිබඳව දැඩි කම්පනයට හා දුකට පත්ව සිටින බව කෙන්සිංටන් මාලිගාව මගින් නිවේදනය කර තිබේ.
FBI පරීක්ෂකයින්ගේ මූලික විමර්ශනවලින් හෙළි වී ඇත්තේ ප්‍රහාරකයා ISIS සංවිධානයට පක්ෂපාතීත්වය පළ කර ඇති බවත්,
ඔහු තනි පුද්ගල ක්‍රියාවක් ලෙස මෙම ප්‍රහාරය සිදු කර ඇති බවත්ය.
පෙටිෆර් පවුල විසින් නිකුත් කළ ප්‍රකාශයක සඳහන් වන්නේ "එඩ්වඩ්ගේ අකල් මරණය පිළිබඳ දුක්බර පුවත සමස්ත පවුලම දැඩි ශෝකයට පත් කර ඇති බවත්, මෙම අවාසනාවන්ත සිදුවීමෙන් පීඩාවට පත් අනෙකුත් පවුල්වල සාමාජිකයන් වෙනුවෙන් ද ඔවුන්ගේ සානුකම්පිය බවත්ය."
0 Comments