සුපිරි වෙළෙඳසැල්වලින් භාණ්ඩ සොරකම් කිරීමේ නිරත වූ පවුලක සාමාජිකයන් තිදෙනෙකු ඇතුළු පුද්ගලයන් සිව් දෙනෙකු මාස 11ක සිඟිති දැරියක සමඟ සිටියදී ඉංගිරිය කැටකඩැල්ල මාර්ග බාධකය අසලදී අත්අඩංගුවට ගැනීමට ඉංගිරිය පොලීසිය සමත් වී තිබේ.
පොලිස් විමර්ශනවලින් හෙළි වී ඇති ආකාරයට, අත්අඩංගුවට ගත් පුද්ගලයන් අතර වයස අවුරුදු 17ක තරුණියක්, ඇගේ සැමියා, තරුණියගේ පියා සහ ත්‍රීරෝද රථ රියැදුරෙකු සිටින අතර, ඔවුන් සතුව රුපියල් 55,000ක පමණ වටිනාකමින් යුත් කිරිපිටි, සුවඳ විලවුන්, ෂැම්පූ බෝතල් ඇතුළු සොරකම් කළ භාණ්ඩ තොගයක් සොයාගෙන ඇත.
සිද්ධිය සම්බන්ධයෙන් වැඩිදුර විස්තර සපයමින් ඉංගිරිය පොලීසිය පැවසූ ආකාරයට,
ජනවාරි 22 වන දින දිවා කාලයේදී ඉංගිරිය කැටකැරැල්ල මාර්ග බාධකයේ රාජකාරියේ නියුතුව සිටි පොලිස් නිලධාරීන් කණ්ඩායමක් වෙත බස්නාහිර පළාත් බුද්ධි ඒකකයේ පොලිස් කොස්තාපල් 61586 චතුරංග නිලධාරියාගෙන් ලැබුණු තොරතුරක් මත මෙම වැටලීම සිදු කර ඇත.
රත්නපුර දෙසින් පැමිණ මාර්ග බාධකය හරහා ඉංගිරිය දෙසට ගමන් කරමින් සිටි ත්‍රීරෝද රථයක් නවතා පරීක්ෂා කිරීමේදී එහි ගමන් කළ කිසිවෙකු සතුව වලංගු ජාතික හැඳුනුම්පත් නොතිබීම හේතුවෙන් ඇති වූ සැකය මත රියැදුරුගේ බලපත්‍ර පරීක්ෂාවට ලක් කර තිබේ. එහිදී රියැදුරු බලපත්‍රය ඇතුළු සියලු ලියකියවිලි කල් ඉකුත් වූ ඒවා බව හෙළි වී ඇත.
පරීක්ෂාව අතරතුර එක් පුද්ගලයෙකුගේ සැක සහිත හැසිරීම හේතුවෙන් පොලිස් සැරයන් 49951 පතිරාජ නිලධාරියා ත්‍රීරෝද රථය වැඩිදුර පරීක්ෂාවට ලක් කර ඇති අතර,
එහි පිටුපස බක්කියේ විශාල ප්‍රමාණයක භාණ්ඩ තොගයක් සැක සහිත ලෙස අසුරා තිබී ඇත.
සැකකරුවන්ගෙන් වෙන් වෙන්ව සිදු කළ ප්‍රශ්න කිරීම්වලදී හෙළි වූයේ අදාළ භාණ්ඩ සියල්ල ජනවාරි 20 සහ 21 යන දිනවල පානදුර වෑකඩ ප්‍රදේශයේ පිහිටි සුපිරි වෙළෙඳසැලකින් සොරකම් කර ගත් ඒවා බවයි. සැකකරුවන් මෙම සොරකම් කළ භාණ්ඩ රත්නපුර සහ කිරිඇල්ල ප්‍රදේශවල වෙළෙඳසැල් හිමියන්ට විකිණීමට උත්සාහ කර ඇතත්, එම වෙළෙඳසැල් හිමියන් එම භාණ්ඩ මිලදී ගැනීම ප්‍රතික්ෂේප කර ඇති බවද පොලිස් විමර්ශනවලදී අනාවරණය වී තිබේ.
මෙම සිද්ධිය සම්බන්ධයෙන් වැඩිදුර විමර්ශන සිදු කරන ඉංගිරිය පොලීසිය, සැකකරුවන් හොරණ මහේස්ත්‍රාත් අධිකරණය වෙත ඉදිරිපත් කිරීමට කටයුතු යොදා ඇත. විශේෂයෙන්ම මාස 11ක පමණ සිඟිති දැරියක සමඟ මෙවැනි සොරකම්වල නිරත වීම සම්බන්ධයෙන් අදාළ බලධාරීන්ගේ අවධානය යොමු වී ඇති අතර, ළමා අපයෝජනය සම්බන්ධයෙන්ද පරීක්ෂණ පැවැත්වීමට නියමිතය.
පොලීසිය භාරයට ගෙන ඇති සොරකම් කළ භාණ්ඩ අතර කිරිපිටි පැකට්, සුවඳ විලවුන් වර්ග, ෂැම්පූ බෝතල් සහ වෙනත් සනීපාරක්ෂක භාණ්ඩ රැසක් ඇතුළත් වන අතර, මෙම භාණ්ඩ නීත්‍යානුකූල අයිතිකරුවන් හඳුනාගැනීම සඳහා විමර්ශන ආරම්භ කර තිබේ. තවද, සැකකරුවන් භාවිතා කළ ත්‍රීරෝද රථයද පොලිස් භාරයට ගෙන තිබේ.
මෙවැනි සුපිරි වෙළෙඳසැල් සොරකම් වැළැක්වීම සඳහා විශේෂ පොලිස් මෙහෙයුම් ක්‍රියාත්මක කරන බවත්, මෙවැනි අපරාධවල නිරත වන පුද්ගලයන්ට එරෙහිව දැඩි නීතිමය පියවර ගන්නා බවත් පොලීසිය අවධාරණය කරයි.
Comments
Post a Comment
Your comment will be visible after approval