හිටපු විදේශ රැකියා අමාත්‍ය මනූෂ නානායක්කාර මහතා සිය සහෝදරයා සම්බන්ධයෙන් පැමිණිලි කළ පළමු පුද්ගලයා තමන් බව ප්‍රකාශ කර සිටියේය. සිරිකොත එක්සත් ජාතික පක්ෂ මූලස්ථානයේ පැවති නව මහලේකම් තලතා අතුකෝරල මහත්මියගේ වැඩභාර ගැනීමේ උත්සවයට සහභාගී වීමෙන් අනතුරුව මාධ්‍ය අමතමින් ඔහු මේ බව සඳහන් කළේය.
තම සහෝදරයා විසින් සිදු කරන ලද විදේශ රැකියා වංචා සම්බන්ධයෙන් මහජනතාව දැනුවත් කිරීමට තමා විශේෂ උත්සාහයක් ගත් බව ඔහු පැවසීය. තමා අමාත්‍ය ධුරය දරන කාලය තුළ මෙවැනි වංචනික ක්‍රියා සම්බන්ධයෙන් මාධ්‍ය හරහා ජනතාව දැනුවත් කිරීමට කටයුතු කළ බවත්, මෙවැනි වංචා සිදු කරන තවත් පිරිස් සිටිය හැකි බවත් ඔහු පෙන්වා දුන්නේය.
තම සහෝදරයාගේ ක්‍රියාකලාපයන්ට තමා කිසිදු ආකාරයකින් සම්බන්ධ නොවන බව අවධාරණය කළ හිටපු අමාත්‍යවරයා, "අතේ ඇඟිලි පහ එක සමාන නොවන ආකාරයට සහෝදරයන්ද සමාන නොවේ" යැයි පැවසීය.
තම නම යොදා ගනිමින් මුදල් වංචා කළ පිරිස් අතර තම සහෝදරයාද සිටින බව ඔහු හෙළි කළේය.
පසුගිය දිනවල මාධ්‍ය වාර්තා මගින් තමා රටින් පලා ගොස් ඇති බවට පළ වූ වාර්තා සම්පූර්ණයෙන්ම අසත්‍ය බව ප්‍රකාශ කළ නානායක්කාර මහතා, තමා නිවාඩුවක් සඳහා පමණක් කෙටි කාලයකට රටින් බැහැරව සිටි බව පැවසීය. තමා කිසිදු වරදක් සිදු කර නොමැති බැවින් රටින් පලා යාමට හේතුවක් නොමැති බවත්, ඕනෑම පරීක්ෂණයකට මුහුණ දීමට සූදානම් බවත් ඔහු අවධාරණය කළේය.
තම අමාත්‍යාංශය යටතේ වසර දෙකක කාලයක් තුළ විදේශ රැකියා ආදායම ලෙස ඩොලර් බිලියන 13කට අධික මුදලක් රටට උපයා දී ඇති බව සඳහන් කළ හිටපු අමාත්‍යවරයා, තමාට එරෙහිව මාධ්‍ය මගින් පළ වන චෝදනා සියල්ල පදනම් විරහිත බව ප්‍රකාශ කළේය.
අවසාන වශයෙන්, මෙම වංචා සම්බන්ධයෙන් ලැබෙන සියලු පැමිණිලි කඩිනමින් විමර්ශනය කරන ලෙස රජයෙන් ඉල්ලීමක් කළ හිටපු අමාත්‍යවරයා, සැබෑ වරදකරුවන් නීතිය හමුවට පමුණුවා දඬුවම් ලබා දිය යුතු බව අවධාරණය කළේය.
0 Comments