රත්නපුර ප්‍රදේශයේ සිදු වූ තරුණියක හා තරුණයින් දෙන්නෙකු අතර පැවති ප්‍රේම සම්බන්ධතා තරගයක් හේතුවෙන් ඇති වූ ගැටුමකදී එක් පෙම්වතකු පැහැරගැනීමට උත්සාහ දැරූ සැකකරුවන් තිදෙනෙකු සහ ත්‍රීරෝද රථ රියදුරු රත්නපුර පොලීසිය විසින් අත්අඩංගුවට ගෙන තිබේ.
සිද්ධිය පිළිබඳ වාර්තා වන ආකාරයට, පසුගිය 10 වැනි දින රත්නපුර නගරයේ උපකාරක පන්තියක් සඳහා පැමිණි ඇහැලියගොඩ පදිංචි අවුරුදු 18ක් වයසැති තරුණයෙකු පැහැරගැනීමට දරන ලද උත්සාහය පොලිස් නිලධාරීන්ගේ සූක්‍ෂම මැදිහත්වීම නිසා වැළකී ගොස් තිබේ.
සිද්ධිය සම්බන්ධයෙන් විමර්ශන සිදු කරන පොලිස් නිලධාරීන් පවසන පරිදි, මෙම තරුණයා හා තරුණියක් අතර පැවති ප්‍රේම සම්බන්ධයකට විරුද්ධ වූ එම පෙම්වතිය යාළු කරගැනීමට උත්සාහ දැරූ අයකු මෙහෙයවූ පිරිසක් විසින් මෙම පැහැරගැනීමේ උත්සාහය සිදු කර ඇත.
උපකාරක පන්තියට සහභාගී වීම සඳහා පැමිණි තරුණයා බස්රථයෙන් බැස යන අවස්ථාවේ ත්‍රීරෝද රථයකින් පැමිණි පිරිසක් ඔහු පැහැරගැනීමට උත්සාහ කර තිබේ. මෙම අවස්ථාවේ තරුණයා ඔවුන්ගෙන් මිදී රත්නපුර ප්‍රධාන බස්නැවතුම්පොළට පැන ගොස් එහි පිහිටි පොලිස් මුර කුටියේ නිලධාරීන්ට සිද්ධිය දැනුම් දී ඇත.
තරුණයාගේ පැමිණිල්ල සැලකිල්ලට ගත් රත්නපුර ප්‍රධාන බස්නැවතුම්පොළේ පොලිස් මුර කුටියේ ස්ථානභාර නිලධාරී සැරයන් 42641 ෆාරුක් සහ සැරයන් 43611 එල්.එස්. සුනිල් ලියනගේ යන නිලධාරීන් වහාම ක්‍රියාත්මක වී සැකකරුවන් අත්අඩංගුවට ගැනීමට සමත් වී තිබේ.
අත්අඩංගුවට ගත් සැකකරුවන් සහ ත්‍රීරෝද රථය රත්නපුර පොලීසියේ සුළු පැමිණිලි අංශයේ ස්ථානාධිපති පොලිස් පරීක්‍ෂක මිණිපුර මහතා වෙත භාර දී ඇති අතර, වැඩිදුර පරීක්‍ෂණ ආරම්භ කර තිබේ.
පොලිස් නිලධාරීන් පවසන පරිදි, සැකකරුවන් අත්අඩංගුවට නොගත්තා නම් තරුණයාගේ ජීවිතයට තර්ජනයක් එල්ල විය හැකිව තිබූ බව පැහැදිලි වී තිබේ. මෙම පැහැරගැනීමේ උත්සාහය පාතාල කණ්ඩායමකට සම්බන්ධ පිරිසක් විසින් සිදු කළේද යන්න පිළිබඳව විශේෂ අවධානයක් යොමු කර ඇති අතර, මෙය කාගේ උපදෙස් මත සිදු කෙරුණු සිදුවීමක්ද යන්න පිළිබඳව පරීක්‍ෂණ පැවැත්වෙන බව පොලිස් නිලධාරියෙක් වැඩිදුරටත් පැවසීය.
රත්නපුර පොලීසිය සිද්ධිය සම්බන්ධයෙන් වැඩිදුර පරීක්‍ෂණ පවත්වන අතර, මෙවැනි සිදුවීම් වැළැක්වීම සඳහා විශේෂ මැදිහත්වීමක් සිදු කරන බවද පොලීසිය පවසයි. මෙම සිද්ධිය සම්බන්ධයෙන් වැඩිදුර පරීක්‍ෂණ සිදු කරමින් පවතින අතර, අදාළ සැකකරුවන්ට එරෙහිව නීතිමය පියවර ගැනීමට නියමිතය.
0 Comments