රට ගිය මාධවී හිරේ ලැග ඇඳි­වත පිටින් ගෙදර එයි

අනවසර විදෙස් රැකියා ඒජන්සියක වංචාවට හසුවී, මැදපෙරදිග රටවල මාස ගණනාවක් දුක් විඳ, හිර දඬුවම් පවා විඳ, අවසානයේ ඇඳි වත්පිටින් මව්බිමට පැමිණි තරුණ කාන්තාවක් පිළිබඳ කනගාටුදායක පුවතක් බණ්ඩාරවෙල සාමචේතිය ගම්මානයෙන් වාර්තා වේ. 21 හැවිරිදි මාධවී විශ්වනාදන් නමැති මෙම එක්දරු මව, තම පවුලේ දුගී දුප්පත්කම නිසා හා නිවසක් ඉදිකර ගැනීමේ බලාපොරොත්තුවෙන් 2024 මාර්තු මාසයේදී මැදපෙරදිග රැකියාවක් සඳහා පිටත්ව ගොස් තිබේ.

මාධවී පවසන ආකාරයට, ඇය මුලින්ම ඩුබායි රාජ්‍යයට ගොස් ඇත්තේ නීත්‍යානුකූල වීසා බලපත්‍රයක් මත බව විශ්වාස කරමිනි. නමුත් මාසයක සේවයෙන් පසු වැටුප් ඉල්ලූ විට දැඩි පහරදීම්වලට ලක්ව, ආහාරපාන පවා නොලබා දුක් විඳීමට සිදුව ඇත.

"මට දුන්නේ එක කුඹුස් ගෙඩියක් සහ රොටියක් පමණයි. ඊට පස්සේ මාව ඕමාන් රටට යැව්වා. එහෙදිත් හරියට රැකියාවක් ලැබුණේ නැහැ. මාසයක් ඒජන්සියේ හිටියා. ලැබුණු සුළු වැටුපත් ඒජන්සිය විසින් රඳවා ගත්තා," යැයි මාධවී පැවසුවාය.

අවසානයේ ඕමාන් තානාපති කාර්යාලයට පැමිණි විට,

ඇය සංචාරක වීසා මත පැමිණ සිටින බව හෙළි වී තිබේ. මෙම තත්ත්වය යටතේ තානාපති කාර්යාලයට ඇයව භාර ගැනීමට නොහැකි වී ඇත.

"මම පාරේ අසරණ වුණා. මා වගේම තවත් කොල්ලො කෙල්ලො විශාල පිරිසක් මේ විදිහට අසරණ වෙලා හිටියා. අවසානයේ පොලීසියට හසුවුණා," යයි ඇය පැවසුවාය.

පොලිස් අත්අඩංගුවට පත්වීමෙන් පසු මාස හයක සිර දඬුවමක් සහ ඩිරාම් 500ක දඩයක් නියම වී ඇත. සිර කඳවුරේදී ඇයට දැඩි වද හිංසා පමුණුවා ඇති අතර, අත කැපීම්, පිළිස්සීම් සහ උණු වතුරෙන් පිච්චීම් වැනි කෲර ක්‍රියාවලට මුහුණ දීමට සිදුව තිබේ.

"එහි සිටි තවත් කාන්තාවන්ට දූෂණය කර, පහර දී, ඝාතනය කර බෑග්වල දමා ඉවත් කරනු දුටුවා. සමහර අය නිරුවත් කර දූෂණය කර අගුලු දැමූ කාමරවල හිර කර තැබුවා," යැයි ඇය හෙළි කළාය.

මාධවීගේ මව වන ඥානයියා ජෝති මහත්මිය පවසන පරිදි, ඔවුන් දැනට සියයට විස්සක පොලියට රුපියල් ලක්ෂ පහකට වැඩි මුදලක් ණයට ගෙන ඇත. මෙම මුදල් ලබාගෙන ඇත්තේ දියණිය විදෙස් ගත කිරීමට සහ නැවත ගෙන්වා ගැනීමට වැය වූ වියදම් සඳහාය.

මාධවීගේ සැමියා වන විශ්වනාදන් කුලී වැඩ කරමින් මසකට රුපියල් 60,000ක පමණ ආදායමක් උපයන අතර, එම මුදල ජීවත්වීමට පවා ප්‍රමාණවත් නොවන බව පවසයි.

පවුල දැනට පොලීසියෙන් සහන ඉල්ලා සිටින නමුත්, තවමත් සාධාරණයක් ඉටු වී නොමැත. ඔවුන් රජයෙන් ඉල්ලා සිටින්නේ වංචනික ඒජන්සිකරුගෙන් තම මුදල් නැවත ලබා ගැනීමට සහය වන ලෙසයි.

මෙම සිද්ධිය විදෙස් රැකියා ඒජන්සි නියාමනය කිරීමේ වැදගත්කම පෙන්වා දෙන අතර, නීති විරෝධී ලෙස විදෙස්ගත වන ශ්‍රමිකයින් මුහුණ දෙන අවදානම් තත්ත්වය පිළිබඳව සමාජ අවධානය යොමු කරයි. මෙවැනි සිදුවීම් වැළැක්වීම සඳහා දැඩි නීතිමය ක්‍රියාමාර්ග අවශ්‍ය බව පෙනී යයි.