ක්ලීන් ශ්‍රී ලංකා වැඩසටහන යටතේ රජය බස් , ත්‍රීරෝද රථ නවීකරණය නවතා ඇති අතර ඊට අමතරව මේ දක්වා බස් වැරදි දැක දැක නොදුටු සේ සිටි පොලිසිය දිගට හරහට බස් වැරදි සදහා දඩ කොළ ලියන්නට පටන්ගෙන තිබේ. මෙම තත්වය නොරිස්සූ බස්රථ සංගම් දැන් වර්ජනයකට සැරසෙන අතර මෙම කුපිතවීම පෙන්නුම් කළ
පසුගියදා පානදුර ප්‍රදේශයේ සිදුවූ සිද්ධියක් හේතුවෙන් පෞද්ගලික බස් රථ හිමියන් සහ රජයේ බලධාරීන් අතර උණුසුම් තත්ත්වයක් මතුව තිබේ.
ක්ලීන් ශ්‍රී ලංකා වැඩසටහන යටතේ පොලීසිය විසින් ක්‍රියාත්මක කරනු ලබන බස්රථ පරීක්ෂාවන්ට එරෙහිව පෞද්ගලික බස්රථ හිමියන් වර්ජන ක්‍රියාමාර්ග ගැනීමට සූදානම් වන බව අතර අද (8) තීරණයක් ගන්නා බවද කියා ඇත.
පෙරකී උණුසුම් තත්ත්වයට හේතු වූයේ පානදුර-කොළඹ මාර්ග අංක 100 බස් මාර්ගයේ ධාවනය වූ පෞද්ගලික බස් රථයක රියදුරෙකු විසින් පොලිස් නිලධාරීන්ගේ උපදෙස්වලට පටහැනිව කටයුතු කිරීමයි. පානදුර හොරේතුඩුව පාලම අසලදී සිදුකළ වාහන පරීක්ෂාවකදී එම බස් රථයේ රියදුරු විසින් සිදුකර තිබූ නීති උල්ලංඝනය කිරීම් තුනක් සම්බන්ධයෙන් පොලීසිය දඩ පත්‍රයක් නිකුත් කර ඇත.
බස්නාහිර පළාත් මාර්ගස්ථ මගී ප්‍රවාහන අධිකාරියේ සභාපති විශ්‍රාමික කොමදෝරු ගාමිණී ජාසිංහ මහතාගේ ප්‍රකාශයට අනුව, එම බස් රථයේ රියදුරු ප්‍රධාන මාර්ගය අවහිර වන සේ නැවැත්වීම, බස් නැවතුම්පොළට පිටින් මගීන් නංවා ගැනීම හා පදික මාරුව අවහිර වන සේ බස් රථය නැවැත්වීම යන වැරදි සිදුකර ඇත. කෙසේ වෙතත්, දඩ පත්‍රය ලැබීමෙන් පසු රියදුරු විසින් බස් රථයේ ගමන් කරමින් සිටි විසිපහක පමණ මගීන් පිරිසක් මැද මාවතේ බස්සවා බස් රථය ආපසු හරවාගෙන ගොස් ඇත.
මෙම සිද්ධිය සම්බන්ධයෙන් දැඩි ක්‍රියාමාර්ග ගනිමින් බස්නාහිර පළාත් මාර්ගස්ථ මගී ප්‍රවාහන අධිකාරිය විසින් අදාළ බස් රථයේ මාර්ග බලපත්‍රය, රියදුරු හා කොන්දොස්තරගේ බලපත්‍ර තාවකාලිකව අත්හිටුවා ඇති අතර, ඔවුන්ගේ සේවයද අත්හිටුවා තිබේ.
මෙම තත්ත්වය හේතුවෙන් දැඩි විරෝධය පළ කරමින් ලංකා පෞද්ගලික බස් හිමියන්ගේ සංගමය මානව හිමිකම් කොමිසමට සහ ජාත්‍යන්තර මානව හිමිකම් සංවිධානවලට පැමිණිලි කිරීමට සූදානම් වන බව එම සංගමයේ සභාපති ගැමුණු විජේරත්න මහතා පවසයි. මේ සම්බන්ධයෙන් වැඩබලන පොලිස්පතිවරයා සමඟ සාකච්ඡාවක් පැවැත්වීමටද කටයුතු යොදා ඇති අතර, එම සාකච්ඡාවෙන් පසු තම ඉදිරි ක්‍රියාමාර්ග තීරණය කරන බව ඔහු වැඩිදුරටත් පැවසීය.
මෙම ගැටලුව සම්බන්ධයෙන් බස් රථ සේවකයන් සහ බස් සංගම් නියෝජිතයන් අතර විශේෂ සාකච්ඡාවක් පැවැත්වීමටද කටයුතු කරන බව වාර්තා වේ. මේ අතර, බස් රථ හිමියන්ගේ සංගමය විසින් බස් රථ වර්ජනයක් සම්බන්ධයෙන් අවසන් තීරණයක් ගැනීමට නියමිතව ඇති අතර, එම තීරණය පිළිබඳව සිය සාමාජිකයන් සමඟ සාකච්ඡා කර දැනුම් දෙන බව සංගම් නායකයන් පවසයි.
මෙම තත්ත්වය මගී ජනතාවගේ ප්‍රවාහන සේවාවන්ට බලපෑමක් ඇති කිරීමේ අවදානමක් පවතින අතර, රජයේ බලධාරීන් සහ බස් සංගම් අතර සාකච්ඡා මගින් මෙම ගැටලුව විසඳා ගැනීම කෙරෙහි මහජන අවධානය යොමුව තිබේ. ක්ලීන් ශ්‍රී ලංකා වැඩසටහන යටතේ සිදුකරන මෙවැනි පරීක්ෂාවන් මගීන්ගේ ආරක්ෂාව සහ ගමනාගමන සේවාවන්හි ගුණාත්මක භාවය වැඩිදියුණු කිරීම සඳහා වැදගත් වන නමුත්, එය ක්‍රියාත්මක කිරීමේදී සියලු පාර්ශ්වයන්ගේ අදහස් සැලකිල්ලට ගැනීම අත්‍යවශ්‍ය බව පෙනී යයි.
0 Comments