ඩයනා ගමගේ යනුවෙන් සිය නම ඇතුළත් කළ ජාතික හැඳුනුම්පතක් සෑදීම සඳහා ව්‍යාජ උප්පැන්න සහතිකයක් සෑදීමට අනුබල දීම ඇතුළු චෝදනා යටතේ ගොනු කර ඇති නඩුවේ හිටපු රාජ්‍ය ඇමැතිනි ඩයනා ගමගේ යන අයට ඊයේ (09දා) කොළඹ මහාධිකරණ විනිසුරු මංජුල තිලකරත්න මහතා ඉදිරියේ චෝදනා කියවා දුන්නේය.
ඒ අනුව අධි චෝදනා තුන කියවාදීමෙන් අනතුරුව නීතිපතිවරයා විසින් තමන්ට එරෙහිව ගොනු කර ඇති අධි චෝදනා තුනට තමන් නිවැරැදිකාරිය වන බවට විත්ති කූඩුවේ සිට ඩයනා ගමගේ යන අය අධිකරණය හමුවේ ප්‍රකාශ කළාය.
අනතුරුව විත්තිකාරිය වෙනුවෙන් ජනාධිපති නීතිඥ ශානක රණසිංහ මහතා අධිකරණය හමුවේ පෙනී සිටි අතර තම සේවාදායිකාවට එරෙහිව ගොනු කර ඇති පළමු හා දෙවන චෝදනා ඉදිරියට පවත්වාගෙන යෑමට නොහැකි බවට කරුණු පෙන්වා දෙමින් මූලික විරෝධතාවක් ඉදිරිපත් කර සිටියේය.
තම සේවාදායිකාවට එරෙහිව ගොනු කර ඇති චෝදනාවලට පදනම් වී ඇත්තේ ඇයගේ නම සංශෝධනය කිරීමට අදාළව 2003.12.11 දින අංක 4685 දරන උප්පැන්න ලේඛනයට යොදා ඇති සටහනක් බවට පෙන්වා දෙමින් ජනාධිපති නීතිඥවරයා අධිකරණය හමුවේ කරුණු දැක්විය.
එසේම චෝදනා ගොනු කර ඇති දිනය හා සසඳා බලන විට වසර විස්සක කාලයක් ගෙවී ගොස් ඇති බැවින් මෙම චෝදනා පදනම් විරහිත බැවින් චෝදනා ඉදිරියට පවත්වාගෙන යෑමට නොහැකි බවට පෙන්වා දෙමින් ජනාධිපති නීතිඥවරයා සිය මූලික විරෝධතාව ඉදිරිපත් කළේය.
විත්තිය විසින් ඉදිරිපත් කරන ලද එම මූලික විරෝධතාවය පදනම් විරහිත බවට නිගමනය කරමින් මූලික විරෝධතාව ප්‍රතික්ෂේප කළ විනිසුරුවරයා මෙම නඩු විභාගය ඉදිරියට පවත්වාගෙන යෑමට සාක්ෂි විභාගයට ගැනීමට නීතිපතිවරයාට අවසර ලබා දුන්නේය.
එම ලේඛනයේ සඳහන් කර ඇති දිනය හා සසඳා බලන විට වසර විස්සක කාලයක් ගෙවී ගොස් ඇති බැවින් එම චෝදනා ඉදිරියට පවත්වාගෙන යෑමට නොහැකි බවට විත්තියේ නීතිඥවරයා මූලික විරෝධතාවක් ඉදිරිපත් කළද චෝදනා සම්බන්ධයෙන් නිගමනය කළ යුත්තේ මෙම අවස්ථාවේදී නොව නඩුවේ පැමිණිල්ලේ සාක්ෂි විභාගයෙන් අනතුරුව බවට විනිසුරුවරයා එහිදී ප්‍රකාශ කළේය.
පැමිණිල්ලේ සාක්ෂි අනුව චෝදනා පත්‍රයේ සඳහන් යම් චෝදනාවක් සනාථ නොවන්නේ නම් විත්තිකාරිය එම චෝදනාවලින් නිදහස් කිරීමට තම අධිකරණය පියවර ගන්නා බවද විනිසුරුවරයා එහිදී වැඩිදුරටත් සඳහන් කළේය.
අනතුරුව පැමිණිල්ල වෙනුවෙන් දෙහිවල ප්‍රාදේශීය ලේකම් කාර්යාලයේ සේවය කළ විශ්‍රාමික ෙදාන් සුමතිපාල මහතා රජයේ අධි නීතිඥ අකිලා දල්පදාදු මහත්මියගේ මෙහෙයවීමෙන් අධිකරණය හමුවේ
සාක්ෂි ලබා දුන් අතර නඩුවේ වැඩිදුර සාක්ෂි විභාගය ලබන මාර්තු මස 05 දින දක්වා කල් තැබීමට විනිසුරුවරයා නියෝග කළේය.
2004 ඔක්තෝබර් මස 09 හා 2004 දෙසැම්බර් 01 කාලය අතරතුරදී සිය නම ඩයනා ගමගේ ලෙස නීත්‍යනුකූලව සංශෝධනය කර නොමැති බව හා ශ්‍රී ලංකා පුරවැසියකු නොවන බව දනිමින්ම සිය නම ඩයනා ගමගේ ලෙස ඇතුළත් කොට ජාතික හැ¾දුනුම්පතක් සකස් කිරීම සඳහා ව්‍යාජ උප්පැන්නයක් සෑදීමට අනුබල දීම, එයට රජයේ නිලධාරීන් පෙලඹවීමට උත්සාහ දැරීම ඇතුළු චෝදනා තුනක් යටතේ නීතිපතිවරයා විසින් මෙම නඩුව මහාධිකරණය හමුවේ ගොනු කර තිබිණි.
හංසි නානායක්කාර
0 Comments