පොලිස් මූලස්ථානයේ ‘ඊ ට්‍රැෆික්‘ ජංගම දුරකතන යෙදවුම සඳහා පැය 24ක පමණ කාලයක් තුළ දී රථ වාහන වැරදි සම්බන්ධයෙන් පැමිණිලි 120ක් ලැබී ඇතැයි පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නීතිවේදී බුද්ධික මනතුංග මහතා පැවසීය.
ඒ යටතේ වීඩියෝ දර්ශන පැමිණිලි හා ඡායාරූප පැමිණිලි ද මහජනතාවගෙන් ලැබී ඇතැයි මාධ්‍ය ප්‍රකාශකවරයා කීය.
‘ක්ලීන් ශ්‍රී ලංකා’ වැඩසටහන හා සමගාමීව ශ්‍රී ලංකා පොලීසිය විසින් ක්‍රියාත්මක කරන ලද වැඩපිළිවෙළෙහි පළමු අංගය ලෙස රථවාහන වැරදි අවම කර ගැනීම සඳහා මහජන සහභාගිත්වය ලබා ගැනීම අරමුණු කරගෙන ‘ඊ ට්‍රැෆික්’ නමැති ජංගම දුරකතන යෙදවුම පොලිස් මූලස්ථානයේ දී වැඩ බලන පොලිස්පති ප්‍රියන්ත වීරසූරිය මහතාගේ ප්‍රධානත්වයෙන් පෙරේදා (1) එළිදක්වනු ලැබීය.
පොලිස් මූලස්ථානයේ ස්ථාපිත කර ඇති මෙහෙයුම් මැදිරිය මඟින් එම ඡායාරූප හෝ වීඩියෝපට අධ්‍යයනය කිරීමෙන් අනතුරුව විමර්ශන සඳහා අදාළ ආයතන වෙත යොමු කරන බව මාධ්‍ය ප්‍රකාශකවරයා කීය.
මහජනතාවට www.police.lk වෙබ් අඩවියේ E-services කොටසින් මෙම යෙදවුම නොමිලේ බාගත කර ගත හැකි බව පොලිස් මාධ්‍ය කොට්ඨාසය වැඩිදුරටත් දන්වා සිටී. e-Traffic යෙදවුම ඇන්ඩ්‍රොයිඩ් වර්ගයේ දුරකථන සඳහා පමණක් දැනට හඳුන්වාදී ඇත.
ඇප් එක බාගැනීමට යොමුව
https://srilanka-etraffic-app.vercel.app/
0 Comments