ශ්‍රී ලංකා විභාග දෙපාර්තමේන්තුව මඟින් පවත්වන විභාග සැලැස්ම පෙර පැවැති පරිදි සාමාන්‍ය තත්ත්වයට 2026 වසරේ සිට පත් කර ගැනීමට හැකිවන බව අගමැති, අධ්‍යාපන, උසස් අධ්‍යාපන සහ වෘත්තීය අධ්‍යාපන ඇමැති ආචාර්ය හරිනි අමරසූරිය මෙණවිය පාර්ලිමේන්තුවේ දී ඊයේ (08) පැවසුවාය.
කොවිඩ් හා ආර්ථික අර්බුදය හේතුවෙන් ජාතික මට්ටමෙන් පැවැති විභාගයන් අදාළ කාලයන්ට නොපැවැත්වීම නිසා පාසල් දරුවන්ගේ අධ්‍යාපනයට අහිතකර බලපෑමක් ඇති කර තිබෙන බවට පාර්ලිමේන්තු මන්ත්‍රිනී නීතිඥ ලක්මාලි හේමචන්ද්‍ර මහත්මිය අගමැතිවරියගෙන් වාචික පිළිතුරු අපේක්ෂාවෙන් ඇසූ ප්‍රශ්නයට පිළිතුරු දෙමින් අගමැතිවරිය මේ බව පැවසුවාය.
අගමැතිවරිය මෙසේ ද පැවසුවාය.
ඒ අනුව ජාතික මට්ටමෙන් පැවැත්වෙන සියලු විභාගයන් 2026 වර්ෂයේ සිට පෙර පැවැති පරිදි සාමාන්‍ය ආකාරයට පැවැත්විය හැකි බවත් කොවිඩ් ආරම්භයට පෙර පැවැති ආකාරයට විභාග කාලයන් නිසි පරිදි සකස් කර ගැනීමට හැකි බවත් අගමැතිවරිය ප්‍රකාශ කළාය.
2020 වර්ෂයේ සිට ඇති වූ කොඩිඩ් තත්ත්වය නිසාත්, 2021, 2022 වර්ෂවල ඇති වූ ආර්ථික අර්බුදය නිසාත් 2020 ත් 2024 ත් දක්වා පාසල් වාර අදාළ වර්ෂ ඉක්මවා පැවැත්වීමට සිදු වූණා. 2025 වර්ෂය සඳහා දින 181ක් විෂය නිර්දේශයට කාලයක් ලබාදෙමින් 2025 වසරේදී දෙසැම්බර් මාසයේදීම පාසල් වාර අවසන් කිරීමට සැලසුම් කර තිබෙනවා.
රටේ සියලුම දරුවන්ට වසර 13ක අධ්‍යාපනයක් තහවුරු කිරීම වත්මන් ආණ්ඩුවේ අපේක්ෂාවයි.
අධ්‍යාපන ආයතන නිසි වර්ගීකරණයකට ලක් කරමින් ආයතනික පද්ධතියේ සිදු කරන ව්‍යුහාත්මක වෙනස්කම් තුළින් 2025 වර්ෂයේ අධ්‍යයන කටයුතු කරනවා. විෂයමාලා ප්‍රතිසංස්කරණ කටයුතු ද 2025 වසරට අදාළව සිදු කරනවා.
0 Comments