මත්ද්‍රව්‍ය ලබා ගැනීමට යතුරුපැදි සොරකම් කර පාතාලයට විකුණන හිටපු හමුදා සෙබළෙකු තලංගම 8 කණුව ප්‍රදේශයේදී යතුරුපැදි හතරක්, ත්‍රිරෝද රථයක් හා යතුරුපැදි කොටස් සමඟ අත්අඩංගුවට ගත් බව තලංගම පොලීසිය පවසයි.
මෙසේ අත්අඩංගුවට පත්වූයේ මාලඹේ, සමනල මාවත, තලාහේන පදිංචි 28 හැවිරිදි විවාහක පුද්ගලයෙකි.
මොහු හමුදා සේවයේ සිට පැවිදිව නැවත උපැවිදි වී ඇති බව පොලීසිය පවසයි. අයිස් මත්ද්‍රව්‍ය භාවිතය හා ජාවාරම සිදු කරන මොහු ඒ සඳහා පල්සර් වර්ගයේ යතුරුපැදි සොරකම් කර පාතාලයට විකුණන බව අනාවරණය වී තිබේ.
දැනට ඩුබායි රාජ්‍යයේ සිටින පාතාල ක්‍රියාකාරිකයෙකු වන බත්තරමුල්ලේ බන්ටි ඇතුළු තවත් පාතාල අපරාධකරුවන් කීපදෙනෙකුගේ සමීපතමයෙකු ලෙස කටයුතු කරන මොහු සොරා ගන්නා යතුරුපැදි පිළිබඳ වට්ස්ඇප් තාක්ෂණය ඔස්සේ බන්ටිට පවසා ඔහු ලබාදෙන උපදෙස් පරිදි ඔහු පවසන ස්ථානයක දමා යන බව පොලීසිය පවසයි.
ඉන් පසු එම ස්ථානය පිළිබඳ ලොකේෂන් දැමූ විට එම යතුරුපැදි ලබාගෙන ඔහුට මුදල් හෝ අයිස් මත්ද්‍රව්‍ය ලබාදෙන බව අනාවරණ වී තිබේ. මීට අමතරව මෙම පුද්ගලයා යතුරුපැදි කොටස්කර අලෙවි කර ඇති බවද අනාවරණ වී තිබේ.
මේ අනුව මාලඹේ, බියගම, සපුගස්කන්ද, තලංගම, ග්‍රෑන්ඩ්පාස්, කොස්ගස් හන්දිය ආදී ප්‍රදේශවලට මෙලෙස යතුරුපැදි දමා ගොස් ඇති බව අනාවරණය වී තිබේ.
අලුයම දෙකත් තුනත් අතර කාලයේ නිවෙස්වල ඇති යතුරුපැදි සොරා ගන්නා මෙම පුද්ගලයා මාලඹේ, පිට්ටුගල ප්‍රදේශයේ බෝඩිං කාමරයකට රැගෙන ගොස් කොටස් කර ඇති අතර තලංගම, උතුවන්කන්ද ප්‍රදේශයේ ඉඩමක අතහැරදමා ගොස් තිබූ යතුරුපැදියක්ද ඔහුගේ ප්‍රකාශ අනුව සොයාගෙන තිබේ.
තලංගම පොලීසිය මොහු අත්අඩංගුවට ගෙන දින හතක රැඳවුම් නියෝග මත වැඩිදුර විමර්ශන සිදුකර ඇති අතර අධිකරණයට ඉදිරිපත් කිරීමට නියමිත බව තලංගම පොලීසිය පවසයි.
(හල්තොට - විනීතා මානෙල් ගමගේ)
0 Comments