බස් එක ඉස්සර කරන්න ගිය ඇල්ටෝව සිමෙන්ති කොට්ටය උස්සන් ගිය අසරණයා මරා දමයි

 
ගලිගමුව නගරයේදී සිමෙන්ති කොට්ටයක් කරේ තබාගෙන මාර්ගය හරහා යාමට උත්සාහ කළ කම්කරුවෙකුට කාර් රථයක හැපී බරපතල තුවාල ලැබීමෙන් පසු කෑගල්ල මහ රෝහලේදී මියගොස් තිබේ.

නුවරඑළිය දික්ඔය, වනරාජා වතුයාය, මාලිගා කොටසේ පදිංචි 39 හැවිරිදි ජේයා මුනින්ද්‍රන් සෙල්වේන්ද්‍රන් නම් වූ මෙම කම්කරුවා අනතුරට ලක්වූයේ ජනවාරි 10 වන දින ය. දින හතරක් තිස්සේ දැඩි සත්කාර ඒකකයේ ප්‍රතිකාර ලබමින් සිටි ඔහු ජනවාරි 14 වන දින අලුයම මිය ගොස් ඇති බව කෑගල්ල පොලිසිය වාර්තා කරයි.

වසර දහයක පමණ කාලයක් ගලිගමුව නගරයේ ගොඩනැගිලි ද්‍රව්‍ය අලෙවි සැලක සේවය කරමින් සිටි මියගිය පුද්ගලයා,

අනතුර සිදුවූ අවස්ථාවේ සිමෙන්ති පැටවූ ලොරි රථයක සිට තවත් ලොරි රථයකට සිමෙන්ති කොට්ටයක් මාරු කිරීමේ කාර්යයේ නිරත වී සිට ඇත.

පොලිස් වාර්තා අනුව, කොළඹ සිට මහනුවර දෙසට ධාවනය වූ බස් රථයකට පසුපසින් පැමිණි ඇල්ටෝ වර්ගයේ කාර් රථයක් බස් රථය පසුකර යාමට උත්සාහ කළ අවස්ථාවේදී මෙම අනතුර සිදුව තිබේ. අධික වේගයෙන් ධාවනය කළ කාර් රථය සිමෙන්ති කොට්ටය රැගෙන යමින් සිටි කම්කරුවාට ගැටී ඇති අතර, එම පහරින් ඔහු මීටර් 35ක් පමණ ඉදිරියට විසි වී ඇත.

අනතුරෙන් බරපතල තුවාල ලැබූ කම්කරුවා වහාම කෑගල්ල මහ රෝහලේ දැඩි සත්කාර ඒකකයට ඇතුළත් කෙරිණි. කෙසේ වෙතත්, දින කිහිපයක් තිස්සේ ජීවිතය සමඟ සටන් කළ ඔහු ජනවාරි 14 වන දින අලුයම කාලයේදී මිය ගොස් තිබේ.

අනතුරට සම්බන්ධ කාර් රථයේ රියදුරු වන රඹුක්කන, කූරියම්පොළ,

මිරිස්වත්තේ පදිංචි 34 හැවිරිදි මෙරගල්ගේ ගවේෂ ජයසූරිය පොලිස් අත්අඩංගුවට ගෙන ඇත. ජනවාරි 11 වන දින කෑගල්ල මහෙස්ත්‍රාත් සශිකා මිතුන ආරච්චිගේ මහත්මිය ඉදිරියේ පැවති නඩු විභාගයේදී සැකකරු තුවාලකරුගේ බිරිඳට රුපියල් 50,000ක වන්දි මුදලක් ගෙවීමට එකඟ වී තිබේ.

මහෙස්ත්‍රාත්වරිය විසින් සැකකරු රුපියල් 5,000ක මුදල් ඇපයක් හා රුපියල් ලක්ෂ දෙකක ශරීර ඇපයක් මත මුදා හැර ඇති අතර, නඩුව යළි ජනවාරි 15 වන දින කැඳවීමට නියම කර තිබේ.

පොලිසිය පවසන පරිදි, මෙම අනතුර සිදුව ඇත්තේ රියදුරුගේ අපරික්ෂාකාරී රිය පැදවීම හේතුවෙනි. මියගිය කම්කරුවාගේ මරණ පරීක්ෂණය කෑගල්ල හදිසි මරණ පරීක්ෂක රේණුකා සුබෝධනී කළුආරච්චි නිශ්ශංක මහත්මිය ඉදිරියේ පැවැත්වීමට නියමිතව තිබේ.

මෙම සිද්ධිය සම්බන්ධයෙන් වැඩිදුර විමර්ශන කෑගල්ල පොලිසිය විසින් සිදු කරමින් පවතී.