පුත්තලම දෙස සිට අනුරාධපුර දෙසට ගමන් කළ ත්‍රිරෝද රථයක් ඉදිරියෙන් පාර හරහා දිවගිය සුනඛයෙකුගේ ගැටීම වැළැක්වීමට යෑමේදී එම ත්‍රිරෝද රථය මාර්ගය හරහා පෙරළී ගොස් බස් රථයක ගැටීම හේතුවෙන් පෙරේදා (05) දොළොස් හැවිරිදි පාසල් දරුවකු ජීවිතක්ෂයට පත්ව ඇති බව රාජාංගණය පොලීසිය පවසයි.
මෙලෙස ජීවිතක්ෂයට පත්ව ඇත්තේ හලාවත වැලිහේන ප්‍රදේශයේ පදිංචි ෂෙවොන් මෙලීෂ නමැති 12 හැවිරිදි සිසුවෙකි.
ත්‍රිරෝද රථය පුත්තලම දෙස සිට අනුරාධපුර දෙසට ධාවනය කරන අවස්ථාවේදී රාජාංගණ හන්දිය ප්‍රදේශයේ, 39 සහ 40 වන කිලෝමීටර් කණු දෙක අතර දී මෙම අනතුර සිදුව ඇති බව පොලීසිය පවසයි.
පාර හරහා දිවගිය සුනඛයාගේ ගැටීම වැළැක්වීම සඳහා ත්‍රිරෝද රථ රියැදුරා එක්වරම දකුණු පසට රථය හැරවූ අවස්ථාවේදී ත්‍රිරෝද රථය පෙරළී මාර්ගය දිගේ ඇදී ගොස් අනුරාධපුර සිට පුත්තලම දෙසට විශේෂ චාරිකාවක් නිමකර ගමන් කරමින් තිබූ පෞද්ගලික බස් රථයේ මුහුණට මුහුණ ගැටී ඇති බව පොලීසිය සඳහන් කළේය.
අනතුරින් ත්‍රිරෝද රථයේ පිටුපස ගමන් කළ පුද්ගලයකු සහ එම දරුවා ප්‍රතිකාර සඳහා නොච්චියාගම රෝහලට ඇතුළත් කර ඇති අතර එම අවස්ථාවේදී කුඩා දරුවා ජීවිතක්ෂයට පත් වූ බවත්, බරපතළ තත්ත්වයේ පසුවූ ත්‍රිරෝද රථයේ රියැදුරා වන වැලිහේන හලාවත පදිංචි 66 හැවිරිදි රූපන් බෙනඩික් යන අය අනුරාධපුර ශික්ෂණ රෝහලට ඇතුළත් කළ බව පොලීසිය පවසයි.
මෙම අනතුර සම්බන්ධයෙන් සැකපිට පුත්තලම ප්‍රදේශයේ පදිංචි බස් රථ රියැදුරා අත්අඩංගුවට ගෙන ඇති අතර අධිකරණයට ඉදිරිපත් කිරීමට නියමිතව ඇත.
අනතුර සම්බන්ධයෙන් රාජාංගණය පොලීසියේ නිලධාරීහු කණ්ඩායමක් වැඩිදුර විමර්ශන සිදු කරති.
(අනුරාධපුර බී.ජී. චතුරංග)
0 Comments