මෙල්බර්න් ක්‍රිකට් ක්‍රීඩාංගණයේ (MCG) පසුගිය 26 වනදා පැවති ඕස්ට්‍රේලියා-ඉන්දියා සිව්වන ටෙස්ට් තරගයේදී සමහර ඕස්ට්‍රේලියානු ප්‍රේක්ෂකයින් ඉන්දියානු සම්භවයක් ඇති ක්‍රීඩා ලෝලීන් වෙත "ඔබේ වීසා කොහෙද?" යනුවෙන් සටන් පාඨ කියමින් සිටි වීඩියෝවක් සමාජ මාධ්‍යවල ව්‍යාප්ත වීමත් සමඟ නව විවාදයක් ඇති වී තිබේ.
තරගය නැරඹීමට පැමිණි 370,000කට අධික ප්‍රේක්ෂකයින්ගෙන් බොහෝ දෙනෙක් විනයගරුකව හැසිරුණ ද, මෙම සිද්ධිය සම්බන්ධයෙන් ක්‍රිකට් ඕස්ට්‍රේලියා සහ මෙල්බර්න් ක්‍රිකට් ක්‍රීඩාංගණ කළමනාකාරීත්වය කණගාටුව පළ කර ඇත.
"මෙවැනි සිදුවීම් දැකීම ඉතා කනගාටුදායකයි. අපි සියලු ප්‍රේක්ෂකයින්ට ආරක්ෂිත හා සාමකාමී පරිසරයක් නිර්මාණය කිරීමට දැඩි වෙහෙසක් දරනවා," MCG ප්‍රකාශකයෙක් පැවසීය.
මෙය මීට පෙර ද සිදුවූ ගැටලුවකි. 2018 වසරේ දී ද මෙවැනි ම සිද්ධියක් වාර්තා වූ අතර, එහිදී දොළොස් දෙනෙකු පමණ ක්‍රීඩාංගණයෙන් ඉවත් කර තිබේ. 2021 දී ඉන්දීය ක්‍රිකට් කණ්ඩායම විසින් සිඩ්නි ක්‍රිකට් ක්‍රීඩාංගණයේදී සිදුවූ වාර්ගික අපහාස සම්බන්ධයෙන් නිල පැමිණිල්ලක් ද ගොනු කර තිබිණි.
බහුසංස්කෘතික ක්‍රියාකාරී ජස්මීන් අස්තානා පවසන්නේ මෙවැනි සිදුවීම් නිසා විවිධ වාර්ගික පසුබිම් වලින් පැමිණෙන ප්‍රේක්ෂකයින් ක්‍රිකට් ක්‍රීඩාවෙන් ඈත් විය හැකි බවයි.
කෙසේ වෙතත්, ක්‍රිකට් ඕස්ට්‍රේලියා 2023 වසර අවසානයේ දී බහුසංස්කෘතික ක්‍රියාකාරී සැලැස්මක් දියත් කර ඇති අතර, එමගින් 2027 වන විට දකුණු ආසියානු ක්‍රීඩා ලෝලීන් සංඛ්‍යාව 200,000 දක්වා ද, ලියාපදිංචි ක්‍රීඩකයින් සංඛ්‍යාව 30,000කින් ද වැඩි කිරීමට අපේක්ෂා කරයි.
පාකිස්තාන සම්භවයක් ඇති ඕස්ට්‍රේලියානු ක්‍රිකට් ක්රීඩක උස්මාන් කවාජා මෙම මුලපිරීමේ ප්‍රධාන මුහුණුවරක් වන අතර, ඔහු පවසන්නේ "දිගු කලක් තිස්සේ ක්‍රිකට් ඕස්ට්‍රේලියාව සුදු ජාතිකයින්ගේ ක්‍රීඩාවක් ලෙස පැවති" බවත්, මෙම නව පියවර "අනාගතයේ වැඩි නියෝජනයක් දැකීමට මග පාදනු ඇති" බවත් ය.video below
0 Comments