ගොවිතැනින් සහ කුලී වැඩ කරමින් යැපුණු එප්පාවල වැසියෝ ඉකුත්දා කඳුරුගස්වැව කිරලෝගම පිහිටි "රුක් සෙවණ අසපුව'' වෙත දිව ආවේ පැතිර යන කටකතාව සත්‍යක් දැයි දැන ගැනීම සඳහාය. ඔවුන් රුක්සෙවණ අසපුවට එන විටත් එප්පාවල පොලිසියේ නිලධාරීහු අසපුව වෙත පැමිණ සිටියහ.
"අසපුවේ හිටිය හාමුදුරුවෝ මරලා දාලා" නිලධාරියෙක් ගම්වැසියන්ට කීය. එම පුවත ළැව් ගින්නක් සේ පැතිර ගියේ ඉන් අනතුරුවය.
ඉකුත් 25 වැනිදා පස්වරුවේ වෙනත් විහාරස්ථානයක හිමිනමක් හදිසි අවශ්‍යතාවක් සඳහා මෙම අසපුව වෙත වැඩම කර ඇත. අසපුවේ විහාරාධිපති හිමියන් සංඝාවාසය අසල මියගොස් සිටිනු උන්වහන්සේ දැක ඇත්තේ ඒ අවස්ථාවේදීය. පසුව සිද්ධිය සම්බන්ධයෙන් ගම්වැසියන් දැනුවත් කර ප්‍රදේශයේ ග්‍රාම නිලධාරිවරයා හා එප්පාවල පොලිසිය දැනුවත් කිරීමට පියවර ගෙන තිබුණේය. පොලිසිය අසපුවට එන්නේ එම දැනුම්දීම මතය. "රුක් සෙවණ අසපුව' පිහිටියේ එප්පාවල පොලිසියට කිලෝමීටර් 7ක් පමණ දුනි. ඝාතනයට ලක්ව තිබුණේ එම අසපුවේ වැඩසිටි 69 හැවිරිදි හිමිනමකි.
එප්පාවල පොලිස් ස්ථානාධිපතිවරයා ඇතුළු අපරාධ විමර්ශන නිලධාර්න් අසපුවට කිසිවකුට ඇතුළු වීමට නොහැකි වන සේ අපරාධයක් සිදුව ඇති බව සංකේතවත් කරන කහ පටි ඒ වටා ඇද සිද්ධිය සම්බන්ධයෙන් විමර්ශන ඇරැඹීය.
අනුරාධපුර කොට්ඨාස භාර ජ්‍යෙෂ්ඨ පොලිස් අධිකාරි තිළිණ හේවාපතිරණ මහතාටද සිද්ධිය දැනුම්දීමෙන් පසු සහකාර පොලිස් අධිකාර්වරයාද සිද්ධිය වූ අසපුවට පැමිණ විමර්ශන සිදුකළ යුතු ආකාරය ගැන නිලධාරීන්ට උපදෙස් දුන්නේය.ඝාතනයට ලක්ව තිබුණේ විලච්චියේ ප්‍රේමරතන නම් වූ හැටනව හැවිරිදි හිමිනමකි. උන්වහන්සේගේ උපන් ගම විලච්චිය වුවද මීට වසර දහයකට පමණ පෙර මෙම හිමිනම මෙම ප්‍රදේශයට වැඩමකොට මෙම රුක් සෙවණ අසපුව" ස්ථාපිත කර තිබිණි. කෙසේ වෙතත් එම අසපුවේ වැඩවාසය කර සිට ඇත්තේද උන්වහන්සේ පමණක් බවද නිලධාරීහු දැනගත්හ. මෙම අසපුව ඉදිකිරීම සඳහා කොළඹ ප්‍රදේශයේ දානපතියන් සම්බන්ධ කරගෙන ඇතත් උන්වහන්සේ විහාරස්ථානය අවට කිසිදු පිටස්තරයකු සමග ඇයි හොඳයිකමක් පවත්වාගෙන ගොස් නැත. මේ නිසා මෙම අසපුවට දානයද ගමේ පිරිසගෙන් ලැබී නැත. ගම්වාසීන් කිහිපදෙනකු ඇරෙන්නට වැඩිදෙනෙක් මේ අසපුවට ගොස් නැත. ඒ නිසා දානය පිළියෙල කර ගැනීම සිදුකර ගන්නේද උන්වහන්සේ විසින්මය.
උන්වහන්සේ මෙලෙස ඝාතනය කිරීම පොලිසියට මහත් ගැටලුවක් ගෙන දුන්නේය. තඹුත්තේගම මහෙස්ත්‍රාත් අධිකරණයටද කරුණු වාර්තා කළ නිලධාරීන් වැඩ බලන මහෙස්ත්‍රාත්වරයාගේ පැමිණීමෙන් පසු ඔහුගේ නියෝග මත හිමිනමගේ දේහය අනුරාධපුර ශික්ෂණ රෝහල වෙත රැගෙන ගියේ පශ්චාත් මරණ පරීක්ෂණයක් සිදුකර පේමරතන හිමිනම ඝාතනය කර ඇත්තේ කෙලෙසද යන්න දැනගැනීමටය. පශ්චාත් මරණ පරීක්ෂණය පැවැත්වූ වෛද්‍යවරයාගේ නිගමනය වූයේ හිසට එල්ල කළ තදබල පහරක් නිසා උන්වහන්සේ අපවත් වී ඇති බවය. එමෙන්ම උන්වහන්සේගේ ගෙල ප්‍රදේශයේද කිසියම් කැපුම් තුවාලයක් දක්නට ලැබිණි.
පශ්චාත් මරණ පරීක්ෂණ වාර්තාවෙන් උන්වහන්සේගේ මරණය ඝාතනයක් බවට තහවුරු වීමත් සමඟ උන්වහන්සේගේ ඝාතකයා සොයා පොලිස් කණ්ඩායම විමර්ශන ඇරැඹිය. ඒත් ඝාතකයා සම්බන්ධයෙන් කිසිදු හෝඩුවාවක් පොලිසියට හමුවූයේ නැත. අසපුව අවට පදිංචිකරුවන්ද උන්වහන්සේ සමඟ හෝ අසපුව සමඟ සබඳතාවක් පවත්වා නැති නිසා අසපුවට ආගිය අය හෝ රැඳී සිටි අයවලුන් ගැනද කිසිදු තොරතුරක් පොලිසිය සතු නොවීය.
මෙලෙස දිගින් දිගටම විමර්ශන සිදු කරද්දී එප්පාවල පොලිසියට අපවත් වූ උන්වහන්සේ ගැන තවත් තොරතුරු ලැබුණේය. ඉන් එක් තොරතුරකින් කියැවුණේ උන්වහන්සේ නිතරම උඩමළුව වෙත වඩින බවකි. එමෙන්ම රුවන්වැලිසෑය සහ උඩමළුව වැඳපුදා ගැනීමට එන බැතිමතුන්ට උන්වහන්සේ , සාස්තර පවා කියා ඇති බවකි.
එමඟින් ලැබෙන පඬුරු උන්වහන්සේගේ වියදමට තබාගන්නා බවට විමර්ශන නිලධාරීන්ට තොරතුරු ලැබිණි.
ඒ හැරෙන්නට උන්වහන්සේගේ ඝාතකයා සම්බන්ධයෙන් කිසිදු තොරතුරක් පොලිසිය සතු නොවීය. ඊට ප්‍රධානතම හේතුව වූයේ උන්වහන්සේ අසපුව වටා පදිංචි කිසිවකු සමඟ සබඳකම් නොපැවැත්වීමය.මේ අතර ගමේ පදිංචිකරුවකු පොලිසියට තවත් තොරතුරක් ලබාදී තිබිණි. ඒ උන්වහන්සේ සතුව ත්‍රිරෝද රියක් තිබූ බවය. නිලධාර්න් ඒ ගැන විපරම් කරද්දී එම ත්‍රිරෝද රථය අසපුවේ නොවීය. එය විමර්ශන නිලධාට ගෙන ආවේ කිසියම් සැකයකි. නිලධාරීර්න් උන්වහන්සේට අයත් ත්‍රිරෝද රිය සොයා විමර්ශන ආරම්භ කළේ ඉන් පසුවය. සිද්ධියෙන් දවසකට පසු එම රථය එප්පාවල නගරයේ අතහැර දමා ගොස් තිබී සොයා ගැනිණි. වැඩි කාලයක් යන්නට මත්තෙන් විමර්ශන නිලධාරීන්ට තවත් තොරතුරක් ලැබුණේය. ඒ එම ත්‍රිරෝද රිය අලුත්වැඩියාව සඳහා එප්පාවල ප්‍රදේශයේ ගරාජයකට දමා තිබූ බවය. නිලධාරීන් වහා එම ගරාජය සොයා ගියේය.
හාමුදුරුවන්ට අයිති ත්‍රීවීලර් එකක් මෙහෙ තිබ්බද?
නිලධාරී ගරාජ් හිමිකරුගෙන් විමසුවේය.
ඔව් සර්... ඒක රෙපයාර් කරලා තිබුණේ. හාමුදුරුවෝ තවත්
කොල්ලෙක් එක්ක ඇවිත් ඒක දැන් දවස් දෙක තුනකට කලින් අරන් ගියා යැයි කීය.
ඒ කොල්ලගෙ නම ගම එහෙම දන්නවද?
"අනේ නැහැ සර්..." අපි කලින් දැකලවත් නැහැ. එදා තමයි හරියටම දැක්කේ. ගරාජ් හිමිකරු ත්‍රීවීලරය රැගෙන ගිය පුද්ගලයාගේ හැඩරුව කීවද ඉන් එහාට කිසිවක් ඔහු දැන සිටියේ නැත.
නිලධාර්න් යළිත් ගැටලුවකට මැදිවිය. ඒ ත්‍රිරෝද රිය ගරාජයෙන් රැගෙන ගිය පුද්ගලයා කවුරුන්දැයි යන්න දැන ගැනීමට නොහැකිවූ නිසාය. නිලධාරීන්ගේ එම උත්සාහයද අපතේ ගියේය.
එහෙත් උත්සාහය අත්නොහළ නිලධාහු යළි අසපුවටම ගොස් එම අසපුව පිරීක්සමින් තවත් කරුණු කාරණා සොයන්නට වූහ. අසපුවේ හෝ ඒ අවට කිසිදු සී.සී.ටී.වී. කැමරාවක් ස්ථාපිත වී නොතිබීමද විමර්ශනයට මහත් බාධාවක් ගෙන දුන්නේය.
"ඔහොම අපි දිගින් දිගටම විමර්ශන කරනකොට අපිට තොරතුරක් ලැබුණා අපවත්වුණු හිමිනම සතුව ජංගම දුරකථනයක් තිබුණා. දැන් ඒක පේන්න නැහැ කියලා.
ඒ තොරතුරට අනුව අපි අසපුව අස්සක් මුල්ලක් නෑරම සෝදිසි කළත් හාමුදුරුවන්ගේ දුරකථනය සොයා ගන්න බැරිවුණා. ඒ නිසා අපි හිතුවා හාමුදුරුවෝ ඝාතනය කළ අපරාධකරුම උන්වහන්සේගේ ජංගම
දුරකථනයත් අරගෙන යන්න ඇති කියලා."
විමර්ශන නිලධාරියෙක් සඳහන් කළේය. එම සැකය මත නිලධාරීන් අපවත් වූ හිමිනමගේ ජංගම දුරකථනයේ අංකය සොයාගෙන අධිකරණ නියෝග මත ඊට අදාළ දුරකථන විශ්ලේෂණ වාර්තාවක්ද ලබාගෙන දුරකථන කුලුනු හරහා එම දුරකථනය ඇත්තේ කොහේදැයි නව තාක්ෂණ ක්‍රම ඔස්සේ සොයා බැලීය. එම දුරකථන විශ්ලේෂණ වාර්තාව හොඳින් නිරීක්ෂණය කළ නිලධාරීන් එම දුරකථනයට ආගිය ඇමතුම් සම්බන්ධයෙන් නිරීක්ෂණයක් කළේය. ''ඔන්න ඔහොම ඒ වාර්තාව බලද්දී හාමුදුරුවන්ගේ ෆෝන් එකෙන් ගත්ත කෝල් එකක නොම්මරයක් අපිට හම්බ වුණා.
අපි ඒකට කතා කරලා බැලුවම ඒ පුද්ගලයා කිව්වා. ඒ මගේ යාළුවෙක්, එයා මීගමුවේ ඉඳන් මට කතා කරලා කිව්වා එයාට බෝඩිමක් හොයලා දෙන්න කියලා".
එම පුද්ගලයා පොලිස් නිලධාරීන්ට කීය. නිලධාර්න් ඔහු පදිංචිව සිටින ස්ථානය විමසා වහා මීගමුව ප්‍රදේශයට ගොස් ඔහු හමුවිය. එහිදී ප්‍රශ්න කරන්නට වූහ. මුලින් මුලින් බොරු බේගල් ඇද දැමුවද අවසානයේ ඇත්ත කියන්නට ඔහුට සිදුවිය.
"මට ඒ හාමුදුරුවෝ හම්බ වුණේ රුවන්වැලිසෑය ළඟදී සර්" සැකකරු කීවේය.
"තමන්ගේ ගම කොහේද?" නිලධාරියෙක් විමසීය. "මතුරට"
"මතුරට ඉඳන් මෙහාට ආවේ මොකටද?"
"රස්සාවක් සොයාගෙන. එහෙම එනකොට ඔය හාමුදුරුවෝ රුවන්වැලිසෑය ළඟ සාස්තර කිය කියා හිටියා. මාත් එතැනට ගියා. හාමුදුරුවෝ මගෙන් විස්තර ඇහැව්වා. මම කිව්වා මට කාත් කවුරුත් නැහැ. රස්සාවක් සොයාගෙන ආවේ කියලා. හාමුදුරුවෝ ඇහැව්වා මොනවද කරන්න දන්නේ කියලා. මම කිව්වා වාහන එළවන්න පුළුවන්. ඒත් මගේ ලයිසන් එක නැතිවෙලා තියෙන්නේ කියලා, ඒ පාර තමයි
හාමුදුරුවෝ කිව්වේ මමත් අසපුවක තනියම ඉන්නේ. එහෙ ත්‍රීවීලර් එකක් තියෙනවා. ඒක එළවන්න පුළුවන්ද කියලා. මම කැමැති වුණා. කැමැති වෙලා අසපුවට ගියා. ත්‍රීවීලර් එක ගරාජ් එකක තිබුණේ. හාමුදුරුවෝ මට ඒක අරන් දුන්නා. මම දවස් දෙකතුනක් ත්‍රීවීලර් එකෙන් හාමුදුරුවන්ගේ වැඩ කරලා දුන්නා." සැකකරු පොලිස් නිලධාරීන් හමුවේ කියාගෙන ගියේය.
"ඇයි තමුසෙ එහෙම නම් හාමුදුරුවන්ව මැරුවේ..."
"මට හාමුදුරුවෝ බැන්නා. 'කරදර' කළා. ඒ පාර තමයි මම පොල්ලක් අරන් හාමුදුරුවන්ගේ ඔළුවට ගැහැව්වේ.'' සැකකරු නිලධාරීන් ඉදිරියේ කියන්නට විය. ඔහු අසපුව වෙත රැගෙන ගිය නිලධාරීන් හිමිනමට පහරදුන් මුගුර සහ වක් පිහියක්ද ඝාතනය සිදුවූ ස්ථානයට නුදුරින් තිබී සොයා ගත්තේය.
වැඩිදුරටත් කරන ලද ප්‍රශ්න කිරීමේදී අනාවරණය වන්නේ සැකකරු හිමිනම ඝාතනය කිරීමෙන් අනතුරුව අසපුවේ හිමිනම සන්තකයේ තිබී රුපියල් 13,000ක මුදලක්ද සොරාගෙන ගොස් ඇති බව අනාවරණය විය.
එමෙන්ම විහාරාධිපති හිමියන්ගේ හැඳුනුම්පත ඇතුළු වටිනා ලිපිලේඛන කිහිපයක්ද සැකකරු රැගෙන ගොස් තිබූ අතර එම ලේඛන සහ හැඳුනුම්පත අසපුවට කිලෝමීටර් දෙකක් පමණ දුරින් තලාව-එප්පාවල ප්‍රධාන මාර්ගයේ පලුගස්වැව ප්‍රදේශයේ මාර්ගය අසල කානුවකට දමා තිබියදී සොයාගනු ලැබීය.
26 හැවිරිදි සැකකරු තඹුත්තේගම මහෙස්ත්‍රාත් අධිකරණයට ඉදිරිපත් කිරීමට නියමිතය.
- පොලිස් විමර්ශන ඇසුරින් වාර්තාව: කීර්ති මෙන්ඩිස්
පෙර ලිපි
කිරලෝගම විහාරාධිපති හිමි අසපුව තුළ අභිරහස් ලෙස ඝාතනය කරලා
මහවිලච්චියේ පේමරතන හිමි ඝාතනය ගැන අලුත් තොරතුරු
Comments
Post a Comment
Your comment will be visible after approval