බදුල්ලේ බෝක්කුවක් යට අභිරහස් මළ සිරුරු දෙකක්

ඊයේ (මාර්තු 13) දින බදුල්ල තල්දෙන ප්‍රදේශයේ බදුලු ඔය හා මහියංගණ මාර්ගය අසල බෝක්කුවක් යටින් අබිරහස් ලෙස මිය ගොස් සිටි නාඳුනන පුද්ගලයන් දෙදෙනකුගේ මළ සිරුරු සොයා ගත් බව බදුල්ල පොලීසිය වාර්තා කරයි.


සොයා ගන්නා ලද මළ සිරුරු දෙකම බෙහෙවින් නරක් වී දුගඳ හමමින් තිබූ බව පොලීසිය නිවේදනය කරන ලදී. තල්දෙන බෝලියද්ද මල්වත්ත ප්‍රදේශයේ බදුලු ඔයේ දෙල්ගහයට වැලි තොටුපොළේ වැලි ගොඩ දමමින් සිටි පුද්ගලයකු විසින් මුලින්ම එක් මළ සිරුරක් දැක ඇතැයි පොලීසිය විසින් තහවුරු කරනු ලැබීය.

පොලිස් වාර්තා අනුව, බදුලු ඔයේ ගසාගෙන ආ විශාල දැව කොටයක සිරවී මුනින් අතට හැරී තිබූ මළ සිරුරක් නිර්වස්ත්‍රව, දිරාපත් වී පණුවන් ගසා දුගඳ හමමින් තිබී ඇත.
මෙම මළ සිරුර එතරම් දරුණු ලෙස විනාශ වී තිබූ බැවින් එය හඳුනා ගැනීමට නොහැකි තත්ත්වයක පවතින බවද වාර්තා වේ.

මෙම මළ සිරුර පිළිබඳව දැනුම්දීමෙන් පසු, බදුල්ල පොලීසියේ නිලධාරීන් සහ බෝලියද්ද වසම් භාර ග්‍රාම නිලධාරී චමින්ද ජයවර්ධන මහතා පාරුවක ආධාරයෙන් බදුලු ඔයෙන් එගොඩ වී ගොස් මළ සිරුර සම්බන්ධයෙන් ප්‍රාථමික පරීක්ෂණ පවත්වා ඇත.

මීට අමතරව, ඒ ස්ථානයේ සිට කිලෝමීටර් හතරක පමණ දුරකින් බදුල්ල මහියංගණ ප්‍රධාන මාර්ගයේ තල්දෙන 6 කණුව පුස්සැල්ලාව ප්‍රදේශයේ බෝක්කුවක් යට තවත් නාඳුනන මළ සිරුරක් සොයාගෙන ඇත. මෙම දෙවන මළ සිරුර ද අවට ලඳු කැලෑවට දර කැඩීමට ගිය පුද්ගලයකු විසින් දැක ඇති අතර, ඔහු ලබා දුන් තොරතුරු මත පොලීසිය එම ස්ථානයට පැමිණ ඇත.


පොලීසිය සඳහන් කරන අන්දමට, මෙම අබිරහස් ලෙස මියගොස් සිටි පුද්ගලයන් දෙදෙනා මෙතෙක් හඳුනාගෙන නොමැති අතර, ඔවුන් පිටපළාතක පදිංචි පුද්ගලයන් දෙදෙනකු විය හැකි බවට සැක කෙරේ. තවද, මොවුන් දෙදෙනා කිසියම් පුද්ගලයකු හෝ පුද්ගලයන් විසින් ඝාතනය කර මෙම ස්ථානවලට ගෙනවිත් දමා ඇති බවට ද පොලීසිය සැක පළ කරයි.

බදුල්ල ජ්‍යෙෂ්ඨ පොලිස් අධිකාරි වසන්ත කන්දේවත්ත, පොලිස් අධිකාරි බුද්ධික ගුණසේකර මහත්වරුන්ගේ උපදෙස් මත බදුල්ල මූලස්ථාන ප්‍රධාන පොලිස් පරීක්ෂක ටී.එම්. රත්නායක, පොලිස් පරීක්ෂක බී.එම්. අබේපාල මහත්වරුන් ඇතුළු නිලධාරීහු වැඩිදුර පරීක්ෂණ සිදු කරමින් සිටිති.

මෙම සිද්ධිය සම්බන්ධයෙන් පවත්වනු ලබන පරීක්ෂණ තුළින් මියගිය පුද්ගලයන්ගේ අනන්‍යතාවය හඳුනාගැනීමට හා ඔවුන්ගේ මරණවලට හේතු සෙවීමට බලාපොරොත්තු වේ. මෙම අබිරහස් සිද්ධිය පිළිබඳව බදුල්ල ප්‍රදේශයේ ජනතාව අතර මහත් කතාබහකට ලක්ව ඇති අතර, වැඩිදුර පරීක්ෂණ ප්‍රතිඵල පිළිබඳව මහජනතාව උනන්දුවෙන් බලා සිටී.