"ඔක්ටෝපුසී" යට ඇතුළුවෙන්න බැරිව ගහගත් යෝෂිතගේ යාළුවෝ භාරවෙති

කොළඹ යූනියන් පෙදෙසේ පාර්ක් පාරේ පිහිටි ඔක්ටෝපුසී (Octopussy) රාත්‍රී සමාජශාලාවේ පසුගියදා ඇතිවූ ගැටුම සම්බන්ධයෙන් සැකකරුවන් සිව්දෙනෙකු කොළඹ මධ්‍යම අපරාධ විමර්ශන කාර්යාංශයට (CID) භාරවී ඇති බව වාර්තා වෙයි. මේ වන විට අදාළ සැකකරුවන්ගෙන් ප්‍රකාශ සටහන් කරගැනීම සිදුකරමින් පවතින බව පොලිස් ආරංචි මාර්ග සඳහන් කරයි.

පසුගියදා කොම්පඤ්ඤ වීදිය ප්‍රදේශයේ පිහිටි මෙම රාත්‍රී සමාජශාලාවේ ඇතිවූ ගැටුම සම්බන්ධයෙන් හිටපු ජනාධිපති මහින්ද රාජපක්ෂ මහතාගේ දෙවන පුත් යෝෂිත රාජපක්ෂ මහතා පැය තුනකට ආසන්න කාලයක් ඊයේ (25 වන දින) කොම්පඤ්ඤ වීදිය පොලීසියට ප්‍රකාශයක් ලබාදී තිබේ.


සිද්ධියට අදාළව පොලීසිය විසින් සැකකරුවන් තිදෙනෙකු හඳුනාගෙන ඇති අතර, එම ගැටුමේදී අදාළ ස්ථානයේ සේවයේ නියුතුව සිටි ආරක්ෂක නිලධාරියෙකු පහරකෑමට ලක්ව ඇත. තුවාල ලැබූ ආරක්ෂක නිලධාරියා මේ වන විට කොළඹ පිහිටි පෞද්ගලික රෝහලක ප්‍රතිකාර ලබමින් සිටින බව වාර්තා වේ.

රාත්‍රී සමාජශාලාවේ සිදුවූ මෙම ගැටුම සම්බන්ධයෙන් පරීක්ෂණ පවත්වන කොම්පඤ්ඤ වීදිය පොලීසිය හෙළිකර ඇත්තේ මෙම ගැටුමට සම්බන්ධ වී ඇතැයි පැවසෙන යෝෂිත රාජපක්ෂ මහතා හා ඔහුගේ බිරිඳ නිතිෂා ජයසේකර මහත්මිය පොලීසියට පැමිණ ඇත්තේ වෙන් වෙන්ව මෝටර් රථවලින් බවයි.

අනාවරණය වී ඇති තොරතුරු අනුව, යෝෂිත රාජපක්ෂ මහතා එම රාත්‍රී සමාජශාලාවේ ආරක්ෂක අංශය විසින් ලබාදෙන අත් පළඳනාවක් පැළඳ ඇති අතර, ඔහුගේ බිරිඳ එවැනි අත් පළඳනාවක් පැළඳීම ප්‍රතික්ෂේප කිරීම හේතුවෙන් ඔවුන් දෙදෙනාද අදාළ ස්ථානයට ඇතුළු නොවී පිටව ගොස් ඇති බව පොලිස් වාර්තාවල සඳහන් වේ.


කෙසේ වෙතත්, මෙම සමාජශාලාවේ අයිතිකරු යැයි කියන පොලීසියට පැමිණිලි කර ඇති සමාජ ශාලා හිමිකාරිනී තැනැත්තිය හා ඇයගේ පිරිස යෝෂිත රාජපක්ෂ හා ඔහුගේ පිරිසට එරෙහිව ඇතිවූ බහින්බස්වීම මෙම ගැටුමට මූලික හේතුව වී ඇති බව මූලාශ්‍ර ආරංචි මාර්ග වාර්තා කරයි.

පොලීසිය මෙම සිද්ධිය සම්බන්ධයෙන් වැඩිදුර පරීක්ෂණ පවත්වමින් සිටින අතර, සිද්ධියට සම්බන්ධ සියලු පාර්ශවයන්ගේ ප්‍රකාශ ලබාගැනීමෙන් අනතුරුව නීතිමය පියවර ගැනීමට නියමිත බව ද වාර්තා වේ.