අධිකරණ නියෝග මගහැර සැඟවී සිටින පොලිස්පති දේශබන්දු තෙන්නකෝන්ගේ බිරිඳගෙන් සහ පුත්‍රයාගෙන් අපරාධ පරීක්ෂණ දෙපාර්තමේන්තුවේ (සීඅයිඩී) නිලධාරීන් ප්‍රශ්න කර ප්‍රකාශයක් සටහන් කරගෙන තිබේ. මෙම ප්‍රශ්න කිරීම හෝකන්දර ප්‍රදේශයේ පිහිටි ඔවුන් පදිංචි නිවසේදී සිදු කර ඇත.
මාතර මහෙස්ත්‍රාත් අධිකරණය විසින් පොලිස්පති දේශබන්දු තෙන්නකෝන් වහාම අත්අඩංගුවට ගන්නා ලෙස නියෝගයක් නිකුත් කර තිබුණද, ඔහු නිවසින් පලා ගොස් සැඟවී සිටින බැවින් මේ දක්වා අපරාධ පරීක්ෂණ දෙපාර්තමේන්තුවට ඔහු සොයා ගැනීමට හැකි වී නොමැත.
අපරාධ පරීක්ෂණ දෙපාර්තමේන්තුවේ නිලධාරීන් කණ්ඩායමක් පොලිස්පතිවරයාගේ නිවස වෙත ගොස් පරීක්ෂා කර බැලූ අවස්ථාවේදී මුලදී එහි කිසිවෙකු සිට නොමැත. කෙසේ වෙතත්, නැවත අවස්ථා කීපයක ගොස් නිවස පරීක්ෂා කිරීමෙන් අනතුරුව, පසුගිය බ්‍රහස්පතින්දා දිනයේදී පොලිස්පතිවරයාගේ පුත්‍රයා සහ බිරිඳ සමඟ සාකච්ඡා කර ඔවුන්ගෙන් ප්‍රශ්න කිරීමට නිලධාරීන්ට හැකි වී තිබේ.
වාර්තා වන ආකාරයට, පසුගිය කාලය තුළ පොලිස්පතිවරයාගේ පුත්‍රයා සහ බිරිඳ ද නිවසින් අතුරුදහන් වී සිට ඇත. ඔවුන් දෙදෙනා නැවත නිවසට පැමිණ ඇත්තේ පුත්‍රයා මෙවර සාමාන්‍ය පෙළ විභාගයට පෙනී සිටීමට නියමිත බැවින් බව ද වාර්තා වේ.
අධිකරණ නියෝග ක්‍රියාත්මක කිරීමේ ක්‍රියාවලිය තවදුරටත් සිදු වෙමින් පවතින අතර, අපරාධ පරීක්ෂණ දෙපාර්තමේන්තුව පොලිස්පති දේශබන්දු තෙන්නකෝන් සොයා ගැනීමට විවිධ ක්‍රියාමාර්ග ගනිමින් සිටී.
Comments
Post a Comment
Your comment will be visible after approval