අම්බලන්ගොඩ වෙඩිතැබීමකින් 'සුද්දා' මරුට

අම්බලන්ගොඩ ඉඩම්තොට ප්‍රදේශයේ සිදු වූ වෙඩි තැබීමකින් සිව්දරු පියෙකු මියගොස් ඇති අතර, සැකකරුවන් මෝටර් සයිකලයකින් පලා ගොස් ඇත. මෙම සිද්ධිය 2025 මාර්තු 14 වන අද දින සවස 6.30ට පමණ සිදුවී ඇති බව අම්බලන්ගොඩ පොලීසිය තහවුරු කර ඇත.

මියගිය පුද්ගලයා ගිනිමාදුර සමන් කුමාර හෙවත් "සුද්දා" ලෙස හඳුන්වන සිව්දරු පියෙකි.
ඔහු නිවසේ සිටියදී යතුරුපැදියකින් පැමිණි පුද්ගලයින් දෙදෙනෙකු විසින් වෙඩි තබා ඇති අතර, ඉන් පසුව ඔවුන් එම ස්ථානයෙන් පලා ගොස් ඇත.
අම්බලන්ගොඩ පොලිස් ස්ථානයට ලැබුණු තොරතුරකට අනුව, වෙඩි වැදීමෙන් තුවාල ලැබූ සමන් කුමාර ප්‍රතිකාර සඳහා බලපිටිය රෝහලට ඇතුළත් කිරීමෙන් පසු මියගොස් ඇත. මියගිය පුද්ගලයා වයස අවුරුදු 45ක් වූ අම්බලන්ගොඩ, ඉඩම්තොට ප්‍රදේශයේ පදිංචිකරුවෙකි.
මෙම වෙඩි තැබීමට හේතුව මේ වන විට නිල වශයෙන් අනාවරණය වී නොමැති නමුත්, පොලිසිය විසින් කරනු ලබන මූලික විමර්ශනවලට අනුව, ඝාතනයට හේතුව පොලිසියට දුන් ඔත්තුවකට පලිගැනීමක් විය හැකි බවට අනුමාන කෙරේ.

සැකකරුවන් අත්අඩංගුවට ගැනීම සඳහා අම්බලන්ගොඩ පොලිසිය දැඩි විමර්ශන කටයුතු ආරම්භ කර ඇති අතර, ප්‍රදේශයේ ආරක්ෂාව තහවුරු කිරීම සඳහා අතිරේක පොලිස් නිලධාරීන් යොදවා ඇත.
ප්‍රදේශවාසීන්ගේ සාක්ෂි අනුව, මෙම වෙඩි තැබීම සිදු වූ අවස්ථාවේ සමන් කුමාර තම නිවසේ ඉදිරිපස සිටි අතර, හදිසියේම මෝටර් සයිකලයකින් පැමිණි දෙදෙනෙකු ඔහුට වෙඩි තබා ඇත. මෙම සිද්ධිය සම්බන්ධයෙන් වැඩිදුර තොරතුරු සොයමින් සිටින අතර, ප්‍රදේශවාසීන්ගෙන් සහ සාක්ෂිකරුවන්ගෙන් ප්‍රකාශ සටහන් කර ගැනීම සඳහා පොලිසිය කටයුතු කරමින් සිටී.