පාවාදීමේ පලියක් ගැනීමේ අරමුණින් පාසල් පන්ති කාමරය තුළදී තිනර් වලට ගිනි තබා සිසුවකුට ගිනි තැබූ පහ වසර සිසුන් තිදෙනෙකු ගම්පොළ කුරුඳුවත්ත පොලිසිය විසින් අත්අඩංගුවට ගෙන පරීක්ෂණ ආරම්භ කර ඇත.
ගම්පොළ අධ්‍යාපන කලාපයට අයත් කුරුඳුවත්ත යටපාන ප්‍රදේශයේ ප්‍රාථමික විද්‍යාලයක සිදුවූ මෙම සිද්ධියට සම්බන්ධ වූයේ වයස අවුරුදු දහය හා එකොළහ වයස්වල සිසුන් තිදෙනෙකි. පන්ති කාමරයේ තිබූ තිනර් බෝතලයක් සොරකම් කිරීම සම්බන්ධයෙන් පාසල් බලධාරීන්ට පැවසීම "පාවාදීමක්" ලෙස සලකා, කෝපයට පත් මෙම සිසුන් තිදෙනා තීන්ත භාජනයකට තිනර් දමා එයට ගිනි තබා සිසුවෙකුගේ ශරීරය දෙසට විසි කර ඇත. ඒ හේතුවෙන් එම සිසුවාගේ දෙපා ගිනිගෙන තුවාල සිදුවී ඇති අතර, සිද්ධිය වූ පෙබරවාරි 13 වැනිදා සිට සතියකට පසු, එනම් මාර්තු 15 වැනිදා වරදකරුවන් තිදෙනා පොලිස් භාරයට ගැනීමට කටයුතු කර තිබේ.
තුවාල ලැබූ සිසුවාගේ ප්‍රකාශයට අනුව, මෙම විද්‍යාලයේ තිබූ තිනර් කෑන් එකක් පහ වසර පන්තියේ සිසුන් විසින් පාසලේ වැසිකිළි ප්‍රදේශයට රැගෙන ගොස් එය හලමින් ගිනි තැබීමේ ක්‍රියාවන්හි යෙදී සිට ඇත. පසුව සිසුවෙකු බෝතලයකට තිනර් පුරවාගෙන තම පාසල් පොත් බෑගයේ සඟවාගෙන ඇති අතර, මෙම සිද්ධිය පාසල් බලධාරීන්ට දැනුම් දුන් බවත්, ඒ හේතුවෙන් මෙම ආරවුල ඇතිවූ බවත් වාර්තා වේ.
සිද්ධිය දින පහ ශ්‍රේණියේ පන්ති භාර ගුරුවරිය පන්තියේ නොසිටි අවස්ථාවක සිදුව ඇති අතර, පාවාදීම පිළිබඳව කෝපයට පත් සිසුවා ඇතුළු තවත් සිසුන් දෙදෙනෙකු තීන්ත භාජනයකට තිනර් පුරවා එයට ගිනි තබා පන්තියේ සිටි සිසුවා දෙසට විසි කර ඇත. එම සිසුවා ගින්නෙන් බේරීමට උත්සාහ කළද, ඔහුගේ දෙපා මතට ගිනි ගන්නා තිනර් වැටීම නිසා ඔහුගේ සිරුරට ගිනි ඇවිලී ඇත. ඔහු කෑගසමින් පහ පන්තියේ සිට හතර පන්තිය දෙසට දිව ගොස් ඇත.
හතර වසර පන්තියේ සිටි ගුරුවරියක් ගිනිගෙන එන සිසුවා අල්ලාගෙන, ඔහුගේ දෙපාවලට පොත් බෑග් වලින් ගසමින් හා ජලය හලමින් ගින්න නිවා දැමීමට කටයුතු කර ඇත. පසුව සිසුවා කුරුඳුවත්ත රෝහලට රැගෙන ගිය අවස්ථාවේ ඔහු ගම්පොළ ශික්ෂණ රෝහලට රැගෙන යන ලෙස උපදෙස් ලැබී ඇත.
කැපී පෙනෙන කරුණක් වන්නේ, මෙම සිද්ධිය පසුගිය පෙබරවාරි 13 දින සිදුව ඇති නමුත්, පාසලේ විදුහල්පතිනිය මේ පිළිබඳව නිසි ක්‍රියාමාර්ගයක් නොගෙන සිද්ධිය වසන් කිරීමට උත්සාහ කර ඇති බවයි. ගුරුවරුන් විසින් පවසා ඇත්තේ තීන්ත ගාමින් සිටියදී බුදු පහන පෙරළී ඒ අසල තිබූ තිනර් වලට ගිනි ඇවිලී සිසුවා පිළිස්සුණු බවයි.
දින පහක් රෝහල්ගත වී සිටි තුවාල ලැබූ සිසුවා සත්‍ය තත්ත්වය හෙළිකරමින් පොලිසියට ප්‍රකාශයක් ලබාදී තිබුණද, ඒ පිළිබඳව නිසි අවධානයක් යොමු නොවී තිබේ. කුරුඳුවත්ත පොලිස් ස්ථානාධිපතිවරයා සිද්ධිය දැනගැනීමෙන් පසුව, සිද්ධියට සම්බන්ධ වයස අවුරුදු දහය හා එකොළහ වයස්වල සිසුන් තිදෙනා පොලිස් භාරයට ගෙන ප්‍රකාශ ලබාගැනීමට කටයුතු කර ඇත.
තුවාල ලැබූ සිසුවාගේ මව වන උඩහේන්තැන්න වීරාව වත්ත පදිංචි එම්. තිලකමනි මෙම සිද්ධිය සම්බන්ධයෙන් පොලිසියට පැමිණිලි කර ඇත. ඇය පවසන පරිදි, මෙම සිද්ධියෙන් පසු ඇගේ දරුවාට මාසයක් පුරා පාසල් යාමට නොහැකි වී ඇත. එසේම, සුව නොවූ තුවාල සඳහා ප්‍රතිකාර ලබාගැනීමට අධික වියදමක් දරමින් ත්‍රීරෝද රථයකින් රෝහලට යාමට සිදුව ඇති බවත්, සිද්ධිය පිළිබඳව සාධාරණයක් ඉල්ලා සිටින බවත් ඇය පවසයි.
කුඩා සිසුන් සිටින පාසල් පරිශ්‍රය තුළ අනතුරුදායක ගිනි ගන්නා ද්‍රාවණ (තිනර්) තබා තිබීම හා සිද්ධිය වසන් කිරීමට උත්සාහ ගැනීම පිළිබඳව විමසීමට විදුහල්පතිනි නිලන්ති ප්‍රදීපිකා මහත්මියට දුරකථනයෙන් සම්බන්ධ වීමට උත්සාහ කළද, මාධ්‍ය විමසීමක් බව දැනගත් විට ඇය දුරකථනය විසන්ධි කර ඇත.
කුරුඳුවත්ත පොලිස් ස්ථානාධිපති, ප්‍රධාන පොලිස් පරීක්ෂක සරත් විජේසිංහ මහතා විසින් මෙම සිද්ධිය ගම්පොළ අධිකරණයට වාර්තා කිරීමට පියවර ගෙන ඇත. එසේම, වරදකරුවන් බාල වයස්කරුවන් වීම නිසා ඔවුන් සම්බන්ධයෙන් ගතයුතු නීතිමය පියවර පිළිබඳව පොලිස් නීති කොට්ඨාසයෙන් උපදෙස් ලබාගැනීමට ද කටයුතු කර ඇති බව වාර්තා වේ.
මෙම සිද්ධිය සම්බන්ධයෙන් සමාජ මාධ්‍යවල ද දැඩි අවධානයක් යොමුව ඇති අතර, පාසල් තුළ සිසුන්ගේ ආරක්ෂාව හා ගිනි ගන්නා ද්‍රව්‍ය ආරක්ෂිතව තබාගැනීම පිළිබඳව දැඩි අවධානයක් යොමු කළ යුතු බවත්, මෙවැනි සිදුවීම් වැළැක්වීමට සුදුසු ක්‍රියාමාර්ග ගත යුතු බවත් අදහස් පළවේ.
Comments
Post a Comment
Your comment will be visible after approval