පාර්ලිමේන්තුවේ 2025 අයවැය විවාදය අතරතුර පැවති වාර්ෂික ගෘහස්ත ක්‍රීඩා උත්සවයේදී ජාතික ජන බලවේගයේ පාර්ලිමේන්තු මන්ත්‍රීනී නිලන්ති කොට්ටච්චි මහත්මිය කාන්තා මේස පන්දු තරඟාවලියේ ශූරතාවය දිනාගැනීමට සමත් වී තිබේ. එමෙන්ම, නියෝජ්‍ය ඇමති චතුරංග අබේසිංහ මහතා සමඟ එක්ව ඇය යුගල මේස පන්දු තරඟාවලියේද ශූරතාවය දිනාගෙන ඇත.
අග්‍රාමාත්‍ය හරිනී අමරසුරිය මහත්මිය, සභානායක ඇමැති බිමල් රත්නායක මහතා ඇතුළු පාර්ලිමේන්තුවේ ප්‍රධානීන්ගේ සහභාගීත්වයෙන් ත්‍යාග ප්‍රදානෝත්සවය පැවැත්වුණු අතර, මෙම ක්‍රීඩා උත්සවය 2025 අයවැය විවාදය අතරතුරදී පවත්වා ඇත.
කාන්තා ඉසව්වේ අනුශූරතාවය සමගි ජන බලවේගයේ පාර්ලිමේන්තු මන්ත්‍රීනී චමින්ද්‍රාණී කිරිඇල්ල මහත්මියට හිමි වී ඇත. පාර්ලිමේන්තු මන්ත්‍රීවරුන් අතර පැවති වාර්ෂික ක්‍රීඩා උත්සවයේ මේස පන්දු තරඟාවලියට අමතරව වෙනත් ක්‍රීඩා ඉසව්ද පැවැත්වී ඇති අතර, මේස පන්දු තරඟාවලිය විශේෂ අවධානයක් දිනා ගැනීමට සමත් වී තිබේ.
ත්‍යාග, කුසලාන සහ සහතිකපත් ප්‍රදානය කිරීමේ උත්සවය අග්‍රාමාත්‍ය හරිනී අමරසුරිය, පාර්ලිමේන්තුවේ සභානායක බිමල් රත්නායක, ක්‍රීඩා කටයුතු නියෝජ්‍ය අමාත්‍ය සුගත් තිලකරත්න, ක්‍රීඩා උත්සවය සංවිධායක පාර්ලිමේන්තු මන්ත්‍රී නලීන් බණ්ඩාර සහ පාර්ලිමේන්තු කටයුතු පිළිබඳ මහලේකම් කුෂානි රෝහණධීර යන පිරිසගේ ප්‍රධානත්වයෙන් සිදුකර තිබේ.
ජයග්‍රාහී මන්ත්‍රීවරිය වන නිලන්ති කොට්ටච්චි මහත්මිය සිය ෆේස්බුක් පිටුව හරහා මෙම ජයග්‍රහණය පිළිබඳ සතුට බෙදාහදා ගෙන ඇත. ඇය සඳහන් කර ඇත්තේ "2025 අය වැය විවාදය අතරතුර පාර්ලිමේන්තුවේ මන්ත්‍රීවරුන් සඳහා පැවැති වාර්ෂික ක්‍රීඩා උත්සවයේ මේස පන්දු තරඟයට මා සහභාගී වූවා. එහි ශූරතාව මා දිනා ගනිද්දි අනුශූරතාව දිනා ගත්තේ චමින්ද්‍රාණී කිරිඇල්ල මන්ත්‍රීතුමිය යි. යුගල මේස පන්දු තරගාවලියේ ශූරතාව මා එක්ක චතුරංග අබේසිංහ මන්ත්‍රීතුමා ජයග්‍රහණය කළා" යනුවෙනි.
තවද, ඇය වැඩිදුරටත් සඳහන් කර ඇත්තේ "පාසැල් සහ විශ්වවිද්‍යාල මේසපන්දු කණ්ඩායම නියෝජනයෙන් වසර දොළහකට පමණ පසු ඉතාම සතුටුදායක, සහයෝගී, සුහදශීලි අත්දැකීමක් ලැබුවා" යනුවෙනි.
මෙම ක්‍රීඩා උත්සවය පාර්ලිමේන්තු මන්ත්‍රීවරුන් අතර සහයෝගීතාව,
මිත්‍රත්වය සහ අන්තර් පක්ෂ සබඳතා වර්ධනය කිරීමේ අරමුණින් සංවිධානය කර ඇති බව වාර්තා වේ. පාර්ලිමේන්තුවේ දැඩි වැඩ කටයුතු මධ්‍යයේ වුවද, මන්ත්‍රීවරුන්ට විනෝදය සහ ශාරීරික යහපැවැත්ම සඳහා අවස්ථාවක් ලබාදීම ද මෙහි අරමුණක් වී ඇත.
පාර්ලිමේන්තුවේ මෙවැනි වාර්ෂික ක්‍රීඩා උත්සව පැවැත්වීම සාම්ප්‍රදායික්‍ව සිදුවන අතර, එය රටේ ප්‍රජාතන්ත්‍රවාදී ආයතනවල සහයෝගීතාව සහ සමගිය ප්‍රවර්ධනය කිරීමේ ක්‍රමවේදයක් ලෙසද සැලකේ.
Comments
Post a Comment
Your comment will be visible after approval