sewwandi-prasanna-still-missing

ගනේමුල්ල ඝාතන සිද්ධියට සම්බන්ධ කාන්තාවට සහ ව්‍යාජ ඔප්පු සකස් කිරීමේ චෝදනාවට ලක්වූ හිටපු අමාත්‍යවරයාට රුපියල් ලක්ෂ දොළහක තෑගි මුදලක්
ගනේමුල්ල සංජීව නමැත්තාට වෙඩි තැබූ සැකකරුට අධිකරණ භූමියට රිවෝල්වර් ගිනිඅවියක් රැගෙන ඒමට උදව් කළ බවට චෝදනා ලැබූ කාන්තාවක් දින 41ක් තිස්සේ පොලිසිය විසින් සොයමින් සිටින බව වාර්තා වේ. මෙම කාන්තාව පිළිබඳ තොරතුරු සපයන අයෙකුට රුපියල් ලක්ෂ දොළහක මුදලක් ප්‍රදානය කිරීමටද පොලිස් මූලස්ථානය තීරණය කර ඇත.
මේ අතර, කැලණිය කිරිබත්ගොඩ ප්‍රදේශයේ ඉඩමකට ව්‍යාජ ඔප්පු සකස් කිරීමේ සිද්ධියකට සම්බන්ධ බවට චෝදනා ලැබ ඇති හිටපු අමාත්‍ය ප්‍රසන්න රණවීර මහතා ද පසුගිය දින 24ක කාලයක් තිස්සේ පොලිසිය විසින් සොයමින් සිටින බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නීතිඥ බුද්ධික මනතුංග මහතා පවසයි.

ගනේමුල්ල සංජීව ඝාතන සිද්ධියට සම්බන්ධ කාන්තාව ලෙස හඳුනාගෙන ඇත්තේ මීගමුව පාර, ජයමාවත, කටුවැල්ලේගම ලිපිනයේ පදිංචි, 25 හැවිරිදි පිංපුර දේවගේ ඉෂාරා සෙව්වන්දි නමැත්තිය වන අතර, ඇය 995892480V ජාතික හැඳුනුම්පත් අංකය හිමි තැනැත්තිය බව පොලිස් මූලස්ථානය සඳහන් කරයි.
සැකකාරිය විසින් ගනේමුල්ල සංජීව නමැත්තාට වෙඩි තැබූ සැකකරුට අධිකරණ භූමියට රිවෝල්වර් ගිනිඅවියක් රැගෙන ආ බවට චෝදනා එල්ල වී ඇති අතර, ඇය අත්අඩංගුවට ගැනීම සඳහා පොලිස් කණ්ඩායම් කිහිපයක් මෙහෙයුම් දියත් කර ඇත. ඇයගේ ඡායාරූප ද මාධ්‍යයට නිකුත් කිරීමට පොලිස් මූලස්ථානය කටයුතු කර තිබේ.
මෙම සැකකාරිය පිළිබඳව තොරතුරු ඇත්නම් 0718591727 දුරකථන අංකය මගින් කොළඹ අපරාධ කොට්ඨාසයේ අධ්‍යක්ෂවරයා වෙත හෝ 0718591735 දුරකථන අංකය මගින් කොළඹ අපරාධ කොට්ඨාසයේ ස්ථානාධිපතිවරයාට දැනුම් දිය හැකි බව පොලිසිය පවසයි.

මීට අමතරව, කැලණිය කිරිබත්ගොඩ ප්‍රදේශයේ ඉඩමකට ව්‍යාජ ඔප්පු සකස් කිරීමේ සිද්ධියක් සම්බන්ධයෙන් සිදුකරන පරීක්ෂණවලට අනුව හිටපු අමාත්‍ය ප්‍රසන්න රණවීර මහතා අත්අඩංගුවට ගැනීමට පොලිසිය සොයමින් සිටින බවත්, අදාළ සැකකරු හෝ සැකකාරිය පිළිබඳව නිවැරදි තොරතුරු ඇත්නම් ඒවා ළඟම පොලිස් ස්ථානයට දැනුම් දිය හැකි බවත් පොලිස් මූලස්ථානය වැඩිදුරටත් සඳහන් කරයි.
පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නීතිඥ බුද්ධික මනතුංග මහතා මාධ්‍ය වෙත ප්‍රකාශ කර සිටියේ මෙම සැකකරුවන් දෙදෙනාම අත්අඩංගුවට ගැනීම සඳහා පොලිසිය අඛණ්ඩව පරීක්ෂණ පවත්වාගෙන යන බවයි.