කුඩු ගහන්න සල්ලි මදිවී මව ඝ‍‍ාතනය කළ පුතා

දෙමටගොඩ ප්‍රදේශයේදී සිය මව දරුණු ලෙස ඝාතනය කිරීමේ චෝදනාවට ලක්ව සිටි පුත්‍රයෙකු පොලිසිය විසින් අත්අඩංගුවට ගෙන ඇත.  පුත්‍රයාගේ අතින්, පයින් සහ කොසු මිටක් යොදා ගනිමින් කළ පහරදීම් වලින් මෙලෙස ඝාතනයට ගොදුරු වූයේ දෙමටගොඩ, ආරාමය පෙදෙසේ පදිංචිව සිටි සාල්වම්මා නමැති 65 හැවිරිදි කාන්තාවක් බව පොලිස් විමර්ශනවලින් අනාවරණය වී ඇත.

පොලිස් විමර්ශනවලට අනුව, පසුගිය 12 වන දින සැකකරු විසින් මුදල් ඉල්ලා සිය මවට හිරිහැර කර ඇති අතර, ඇයට අතින් පයින් ගසා, කොසු මිටකින් පහර දී, තුවාල සිදුකර පසුව නිවසින් පිටව ගොස් ඇත. නිවසේ සිටි මියගිය කාන්තාවගේ සහෝදරිය ඇයව රෝහල් ගත කිරීමට පියවර ගෙන නොතිබිණි.

අසල්වැසියන් සිද්ධිය ගැන දැනගෙන ඇත්තේ දින හතරකට පසුව බවත්, 1990 සුව සැරිය ගිලන් රථයෙන් ඇය කොළඹ ජාතික රෝහලට ඇතුළත් කර ඇති බවත්, දින දෙකකට පසු (18 ) ඇය මිය ගොස් ඇති බවත් පොලිසිය වාර්තා කර ඇත.

අත්අඩංගුවට ගත් සැකකරුගේ බිරිඳ විදේශගතව සිටින අතර, ඔහුගේ එකම පුත්‍රයා පාස්කු ප්‍රහාරය එල්ල වූ දිනයේදී කොච්චිකඩේ දේවස්ථානයේ සිටියදී මිය ගොස් ඇති බව පොලිසිය සඳහන් කරයි.


42 හැවිරිදි සැකකරු කොළඹ ජාතික රෝහල අසලදී අත්අඩංගුවට ගෙන ඇති අතර, ඔහු අධිකරණය හමුවේ ඉදිරිපත් කිරීමට නියමිතය.

පොලිස් වාර්තාවලට අනුව, සැකකරු මත්ද්‍රව්‍ය මිලදී ගැනීමට මුදල් ඉල්ලා මව විසින් ප්‍රතික්ෂේප කිරීමෙන් පසු කුපිත වී ඇති අතර, එය මෙම ප්‍රචණ්ඩත්වයට හේතු වී ඇති බව තහවුරු වී ඇත.

දෙමටගොඩ පොලිසිය තවදුරටත් මෙම සිද්ධිය පිළිබඳව විමර්ශන පවත්වාගෙන යන අතර, මෙවන් දරුණු අපරාධ වැළැක්වීම සඳහා ප්‍රදේශයේ ආරක්ෂාව තහවුරු කිරීමට අවශ්‍ය පියවර ගෙන ඇතැයි ද වාර්තා වේ.