ආදිවාසී නායක උරුවරිගේ වන්නිල අත්තෝ විසින් අපරාධ පරීක්ෂණ දෙපාර්තමේන්තුව (CID) වෙත අද පැමිණ තිබුනේ, හාස්‍ය නළුවන් වන ගෙහාන් බ්ලොක් සහ ඩිනෝ කොරේරා විසින් YouTube හරහා ප්‍රචාරය කරන ලද ආදිවාසී ප්‍රජාව නිරූපණය කරන වීඩියෝව සම්බන්ධයෙන් විධිමත් පැමිණිල්ලක් ඉදිරිපත් කරන්නටය.
පසුගිය සතියේදී, ආදිවාසී නායකයා "බ්ලොක් ඇන්ඩ් ඩිනෝ" නමින් හඳුන්වන මෙම හාස්‍ය නළුවන්ට එරෙහිව නීතිමය පියවර ගැනීමට සූදානම් වන බව ප්‍රකාශ කළේය. ඔහුගේ චෝදනාව වූයේ යූටියුබ්හි ජනප්‍රි‍යවී ඇති සුදු වලිගෙ ඇත්තෝ නමැති මෙම වීඩියෝව මගින් ස්වදේශීය ආදිවාසී ප්‍රජාව වැරදි ලෙස නිරූපණය කරන බවයි.
මාධ්‍ය වෙත අදහස් දක්වමින්, උරුවරිගේ වන්නිල අත්තෝ පැවසුවේ මෙම වීඩියෝව ඔහුගේ ප්‍රජාවේ උරුමය හෑල්ලුවට ලක් කරමින් වාණිජමය අරමුණු සඳහා නිර්මාණය කර ඇති බවත්, එමගින් ඔවුන්ගේ භාෂාව සහ සම්ප්‍රදායන් විකෘති කර ඇති බවත්ය.
මෙහිදී රාජගිරිය ප්‍රදේශයේ සාමාන්‍ය පුද්ගලයෙකු සිය ජීවන රටාව වෙනස් කර "සුදු වලිගේ ඇත්තෝ' නමින් කැලෑ වැද වැද්දෙකු ලෙස වෙස්මාරුකරගත් බව පෙන්වාදෙන වීඩියෝව එහිදී වැද්දෙකු ලෙස ඔහු කරන ව්‍යාජ රංගනය හාස්‍යයට බඳුන් කර තිබේ.
සුදු වලිගේ ඇත්තෝ සුද්දන් සමග ෆොටෝ ගසා මුදල් අය කිරීම, රුවැති කාන්තාවක සමග 'ජිගි ජිගි' කිරීම, නවීන තාක්ෂණය භාවිතකරමින් සැපවත් ජීවිතයක් කුඩා පැල්පතක ගත කිරීම,
දරුවන් වැදි සංස්කෘතියෙන් පිට දේවල් කිරීම වැනි දේවල් මෙම පිටපතේදී ඉදිරිපත් කෙරේ. මේ වනවිට ලක්ෂ 18ක් මෙම වීඩියෝව නරඹා ඇත.
ආදිවාසි නායකයා මෙම නිර්මාණකරුවන් සමඟ සම්බන්ධ වීමට උත්සාහ කර ඇති අතර, වීඩියෝව ඉවත් කරන ලෙස ඉල්ලා සිටියද, එම උත්සාහයන් සාර්ථක නොවූ බවද ඔහු ප්‍රකාශ කර ඇත.
ආදිවාසී ප්‍රජාව ශ්‍රී ලංකාවේ ආදිවාසී ජනතා කන්ඩායමක් පිළිගැනෙන අතර, ඔවුන්ගේ සංස්කෘතිය සහ උරුමයන් රැක ගැනීම සඳහා විශේෂ නීතිමය ආරක්ෂාවක් හිමි වේ. මෙම ක්‍රියාමාර්ගය සමාජ මාධ්‍ය තුළ සංවේදී කණ්ඩායම් සම්බන්ධ හාස්‍ය අන්තර්ගතයන් සම්බන්ධයෙන් පවතින සීමාවන් පිළිබඳව ඇති දැවෙන සංවාදයකට දායක වී ඇත.
CID විමර්ශනය මේ අනුව ක්‍රියාත්මක වනුඇති අතර, අදාළ YouTube වීඩියෝව සම්බන්ධයෙන් ඉදිරි නීතිමය පියවර ගනු ලැබේ. ගෙහාන් බ්ලොක් සහ ඩිනෝ කොරේරා මෙම සිද්ධිය සම්බන්ධයෙන් තවමත් ප්‍රසිද්ධ ප්‍රකාශයක් නිකුත් කර නොමැත.
සම්බන්ධිත පෙර ලිපිය
සුදු වලිගේ ඇත්තෝ වීඩියෝවට එරෙහිව ආදිවාසීන් නඩුමගට
Comments
Post a Comment
Your comment will be visible after approval