මහනුවර දිස්ත්‍රික්කයේ වගා හානි සිදු කරන රිළවුන් අල්ලා එම සතුන් රන්දෙණිගල ජලාශය ආශ්‍රිත අක්කර 200ක් පමණ වපසරියකින් යුත් දූපතකට මුදාහැරීම සඳහා අවශ්‍ය සියලු කටයුතු මේ වන විට සම්පාදනය කොට තිබෙන බව මහනුවර දිස්ත්‍රික් පාර්ලිමේන්තු මන්ත්‍රි ජගත් මනුවර්ණ මහතා පවසයි.
මහනුවරදී පසුගිය 28 වැනි දින පැවති මාධ්‍ය හමුවකදී අදහස් දැක්වූ මන්ත්‍රිවරයා, මෙම වැඩසටහනේ නියමු ව්‍යාපෘතියක් වශයෙන් පහත හේවාහැට මැතිවරණ කොට්ඨාසයේ බරපතළ ආකාරයේ රිළා උවදුරු සහිත ගම්මාන 5ක කෘෂිකර්මයට මෙන්ම ජන ජීවිතයට හානි කරන රිළවුන් අල්ලා මෙම දූපතට මුදාහැරීමට පියවර ගන්නා බව ප්‍රකාශ කළේය.
"කෘෂිකර්මාන්තය මූලික ජීවන රටාවක් ඇති අප රටේ වන සතුන්ගෙන් වගාවට වන හානිය සුළුපටු නැහැ. මේ සම්බන්ධයෙන් අපිට දිගින් දිගටම පැමිණිලි ලැබුණා. ජනතාවගේ මැසිවිලිවලට ඇහුම්කන් දෙන්න සිදු වුණා. ඒ අනුව මේ පිළිබඳව ගත හැකි ක්‍රියාමාර්ග සම්බන්ධයෙන් අපි දිගින් දිගටම සාකච්ඡා කළා. අදාළ පාර්ශ්ව සම්බන්ධ කරගෙන කමිටුවක් පත් කරලා එම වාර්තාව එහෙම නැත්නම් යෝජනාවලිය මහනුවර සම්බන්ධීකරණ කමිටුවට ඉදිරිපත් කරලා එය ක්‍රියාත්මක කිරීමේ අනුමැතිය ලබා ගත්තා," යැයි මන්ත්‍රි මනුවර්ණ මහතා වැඩිදුරටත් පැවසීය.
මෙම නියමු ව්‍යාපෘතිය සඳහා මධ්‍යම පළාත් සභාවෙන් රුපියල් මිලියන 10ක මුදලක් ලැබී ඇති බවත්, වැඩසටහන මහනුවර දිස්ත්‍රික්කය පුරා ක්‍රියාත්මක කිරීමට ඉදිරියේදී කටයුතු කරන බවත් මන්ත්‍රිවරයා සඳහන් කළේය. ඒ සඳහා තවත් අතිරේක මුදල් හොයාගැනීමට සිදුවන බවද ඒ මහතා පෙන්වා දුන්නේය.
"මේ නියමු ව්‍යාපෘතිය ක්‍රියාත්මක කිරීමෙන් අනතුරුව අපිට එහි ඇති අඩුපාඩු හඳුනාගෙන අවශ්‍ය කටයුතු කරන්න පුළුවන්. මේ සාකච්ඡා සඳහා ප්‍රදේශයේ ගොවි ජනතාව සම්බන්ධ කරගත්තා. ඒ අය කියපු දෙයක් තමයි මේ රිළවුන් දූපත්වලට ගිහිල්ලා දැම්මත් ආහාර හිඟවන විට නැවතත් පිහිනා ගොඩබිමට පැමිණෙන බව," යැයි ඔහු පැවසුවේය.
මෙම ගැටලුවට විසඳුමක් ලෙස දූපත වටා විදුලි වැටක් ස්ථාපිත කිරීමට සැලසුම් කර ඇති බවත්, මෙම විසඳුම මුළු ලංකාවටම ගැලපෙන විසඳුමක් නොවන නමුත් මෙම ව්‍යාපෘතිය හරහා එක් එක් ප්‍රදේශවලට ගත හැකි ක්‍රියාමාර්ග සම්බන්ධයෙන් සාකච්ඡා කර ඉදිරියට ගෙන යන බවත් මන්ත්‍රිවරයා අවධාරණය කළේය.
"අපි මෙහිදී කිසිම ආකාරයකින් සතුන්ට හානියක් කරන්නේ නැහැ. මේ සම්බන්ධයෙන් සත්ත්වවේදීන්, සත්ත්ව හා පරිසර සංවිධාන සමඟ අපි අදහස් හුවමාරු කරගත්තා. ඉදිරි සති දෙක ඇතුළත මේ වැඩේ ආරම්භ කරනවා," යැයි මන්ත්‍රී ජගත් මනුවර්ණ මහතා ප්‍රකාශ කළේය.
මාධ්‍ය හමුවේදී අදහස් දැක්වූ පේරාදෙණිය විශ්වවිද්‍යාලයේ පශු වෛද්‍ය පීඨයේ අංශාධිපති ජ්‍යෙෂ්ඨ මහාචාර්ය අශෝක දංගො‍ල්ල මහතා, මෙම සතුන් ආරක්ෂිතව අල්ලා කූඩුගත කිරීමේ ක්‍රමවේද පිළිබඳව අදාළ ප්‍රදේශවල ජනතාවට පුහුණුවක් ලබා දෙන බව සඳහන් කළේය.
"මේ වැඩසටහන දිගින් දිගටම ක්‍රියාත්මක කොට ගහන පාලනය, සත්ත්ව කළමනාකරණය සිදුකළ යුතුයි. පසුගියදා සිදු කළ සත්ත්ව සංගණනය සම්බන්ධයෙන් විවිධ චෝදනා එල්ල වෙනවා. රිළවුන් තියා අපේ රටේ මිනිස්සුත් එක්ක ඉන්න සුනඛ ගහනය පිළිබඳවත් නිශ්චිත සංඛ්‍යාලේඛන නැහැ. මේ සංගණනයෙන් සම්පූර්ණ වාර්තාවක් ගන්න බැරි වුණත් අපිට යම් තීරණයකට මතවාදයකට එන්න පුළුවන්," යැයි මහාචාර්ය දංගො‍ල්ල මහතා වැඩිදුරටත් පැවසීය.
මෙම දූපතට අල්ලා දමන රිළවුන් සඳහා අවශ්‍ය ආහාර ලබාදීමට මේ වන විටද යම් යම් ආයතන හා විවිධ සමාජ සංගම් ඉදිරිපත්ව සිටින බවත්, ඊට අමතරව දිවයින පුරා ආර්ථික මධ්‍යස්ථානවල ඉවතලන එහෙත් සත්ත්ව ආහාර වශයෙන් භාවිත කළ හැකි එළවළු ආදිය ලබාදීමටද බොහෝ පුද්ගලයෝ ඉදිරිපත්ව ඇති බවද මෙහිදී සඳහන් විය.
කලෙකට ඉහතදී සශ්‍රීක ජනාවාසව පැවැති මෙම දූපත්වල මේ වන විටද යම් යම් පලතුරු හා සතුනට ආහාර වශයෙන් ගත හැකි බෝග වර්ග රැසක් පවතින බවද දූපත නිරීක්ෂකයෝ සඳහන් කළහ.
මෙම ව්‍යාපෘතිය ඉදිරි සති දෙක තුළදී ආරම්භ කිරීමට සියලු කටයුතු සූදානම් කර ඇති අතර, එමඟින් ගොවි ජනතාවගේ වගාවන් හා ජන ජීවිතයට සිදුවන හානි අවම කිරීමට අපේක්ෂා කෙරේ.
Comments
Post a Comment
Your comment will be visible after approval