විනාශ කරන්න භාරදුන් 'පාම් ඔයිල්' නැවත කෝටි ගාණකට විකිණූ රේගු නිලධාරියාට වැඩවරදී

මිනිස් පාරිභෝජනයට නුසුදුසු ලෙස සලකා විනාශ කිරීමට නියම කර තිබූ "පාම් ඔයිල්" කන්ටේනර් පහක් රුපියල් කෝටි දෙකකට අධික මුදලකට අයථා ලෙස නිදහස් කිරීමේ සිද්ධියට සම්බන්ධ හිටපු රේගු අධිකාරිවරයකු සහ සිවිල් පුද්ගලයන් දෙදෙනෙකුට ශ්‍රී ලංකා රේගු අධිකාරිය විසින් චෝදනා ඔප්පු වී ඇති බව තීරණය කරමින් ඊයේ (07) දින රුපියල් ලක්ෂය බැගින් දඩ නියම කරන ලදී. ඔවුන්ගේ රැකියාවන් අහිමිවන අතර නැවත රාජ්‍ය සේවයද තහනම් කර ඇත.

ශ්‍රේෂ්ඨාධිකරණ නියෝගයක් මත ශ්‍රී ලංකා රේගුවේ මධ්‍යම විමර්ශන ඒකකය විසින් සිදු කරන ලද පරීක්ෂණය රේගු ආඥා පනතේ 137 වැනි වගන්තිය යටතේ පවත්වා ඇති අතර, හිටපු රේගු අධිකාරි ඩී.කේ.ඩී. විජයවීර මහතා, සිවිල් පුද්ගලයන් වන එස්. අමරසිංහ සහ එස්. කමල් කුමාර යන අය වරදකරුවන් ලෙස නම් කර ඇත. එම අතරම, මෙම සිද්ධියට සම්බන්ධ බවට චෝදනා ලැබ සිටි රේගු නිලධාරීන් හත්දෙනෙකු සහ තවත් සිවිල් පුරවැසියකු චෝදනාවලින් නිදහස් කර ඇත.


ශ්‍රේෂ්ඨාධිකරණයේ නිර්දේශය මත 2024 පෙබරවාරි මාසයේදී ආරම්භ කරන ලද මෙම විමර්ශනයේදී 2025 මාර්තු 26 වන දින සැකකරුවන්ට චෝදනා පත්‍ර භාරදෙන ලදී. විමර්ශනයට ලක් වූ සිද්ධිය 2019 ජනවාරි 25 වන දින සී.අයි.සී.ටී. පර්යන්තයට ගෙන එන ලද පාම් ඔයිල් බහාලුම් පහක් මාස තුනකට වැඩි කාලයක් නිෂ්කාශනය නොකිරීම හේතුවෙන් රේගු ආඥා පනතේ විධිවිධාන අනුව අත්අඩංගුවට ගෙන විනාශ කිරීමට හිටපු රේගු අධ්‍යක්ෂ ජනරාල්වරිය විසින් නියෝග කර තිබූවකි.

එහෙත් 2019 ජූලි මාසයේදී මෙම කන්ටේනර් ඒෂියන් පර්යන්තය වෙත ගෙන ගොස් ඉන් කන්ටේනර් හතරක් මිද්දෙණිය ප්‍රදේශයට සහ තවත් එකක් පෑලියගොඩ ප්‍රදේශයට මුදා හැර ඇති බව විමර්ශනයේදී හෙළි වී තිබේ. එක් කන්ටේනරයක් රුපියල් ලක්ෂ 40 බැගින් ගණන් බලන විට කන්ටේනර් පහේ වටිනාකම රුපියල් කෝටි දෙකක් ඉක්මවන බව රේගු විමර්ශකයින් සොයාගෙන ඇත. මිද්දෙණිය ප්‍රදේශයට මුදා හරින ලද කන්ටේනර් හතර පසුව රේගුව විසින් නැවත අත්අඩංගුවට ගෙන ඇත.


හිටපු රේගු අධිකාරි ඩී.කේ.ඩී. විජයවීර මහතා මෙම විමර්ශන හේතුවෙන් අනිවාර්ය නිවාඩු යවා සිටි බව වාර්තා වේ. චෝදනාවලින් නිදහස් කරන ලද නිලධාරීන් අතර සිවිල් පුද්ගලයෙකු වන එල්.ජී.එස්. පෙරේරා, මහජන සෞඛ්‍ය පරීක්ෂක සෝමතිලක රංගික, රේගු පරීක්ෂක ඩී.ටී. රොෂාන්, නියෝජ්‍ය රේගු අධිකාරි ආර්. ලැනදොර, සහකාර රේගු නිලධාරීන් වන එන්. විජේවර්ධන, ඒ.බී. විජයරත්න, ඩී.එන්. රණසිංහ, සී. කුලරත්න සහ ජේ.සී. මොරගේ යන අය සිටිති.

රේගුවේ මධ්‍යම විමර්ශන ඒකකය විසින් සිදු කරන ලද මෙම පරීක්ෂණයේ ප්‍රධාන විමර්ශන නිලධාරියා ලෙස රේගු අධ්‍යක්ෂ යූ.ඒ.එන්.ආර්. උඩුවිල මහතා කටයුතු කර ඇති අතර, පැමිණිල්ල මෙහෙයවීම රේගු අධ්‍යක්ෂවරුන් වන දිනූෂ හෙට්ටිආරච්චි මහතා සහ රේගු අධ්‍යක්ෂ හර්ෂණ මාපා තිලකරත්න මහතා විසින් සිදු කරන ලදී.
වරදකරුවන් වූ රේගු නිලධාරීන්ගේ නීතිමය නියෝජනය නීතිඥ අසිත් සිරිවර්ධන මහතා විසින් ද, සිවිල් පුද්ගලයන් වෙනුවෙන් නීතිඥ රාහුල් රුවනාර ජයතිලක මහතා සහ නීතිඥ නවීන් මහාආරච්චිගේ මහතා විසින් ද සිදු කරන ලදී.

රේගු ආඥා පනතේ 137 වගන්තිය ප්‍රකාරව දඬුවම් ලද පුද්ගලයන්ට ඉදිරියේදී කිසිදු රාජ්‍ය සේවා තනතුරක සේවය කිරීමට අවසර නොමැති බැවින් මෙම තීරණය ඔවුන්ගේ අනාගත රැකියා අවස්ථාවන්ට ද බලපෑමක් ඇති කරනු ඇත.

මෙම සිද්ධිය මිනිස් පාරිභෝජනයට නුසුදුසු ආහාර ද්‍රව්‍ය පිළිබඳ නීතිවිරෝධී ක්‍රියාකාරකම් මැඩපැවැත්වීමේ රේගුවේ කැපවීම පෙන්නුම් කරන අතර, රාජ්‍ය නිලධාරීන් විසින් සිදු කරනු ලබන වංචා හා අක්‍රමිකතා පිළිබඳව කිසිදු සැලකිල්ලක් නොදක්වන බව ද පැහැදිලි කරයි.