බූස්ස බන්ධනාගාරේ ඇතුළ‍ෙ මරාගැනිල්ල ඔත්තුවක් පිටයාම නිසා යයි සැකයක්

ගාල්ල, බූස්ස අධිආරක්ෂිත බන්ධනාගාරය තුළ දී එක් රැඳවියෙකු විසින් තවත් රැඳවියෙකු උල් ආයුධයකින් ඇන ඝාතනය කළ බව ඊයේ (04) දිනයේදී වාර්තා විය. මෙම ඝාතනයට ලක්වූයේ මත්ද්‍රව්‍ය චෝදනාවක් මත රිමාන්ඩ් භාරයේ සිටි, ගොතටුව, බටලන්දහේන ප්‍රදේශයේ පදිංචිව සිටි 48 හැවිරිදි නන්ද කුමාර ශිවනන්දන් නැමැති රැඳවියා බව අනාවරණය වී තිබේ.

බන්ධනාගාර දෙපාර්තමේන්තුවේ මාධ්‍ය ප්‍රකාශක, බන්ධනාගාර කොමසාරිස් ගාමිණී බී. දිසානායක මහතා තහවුරු කළ ආකාරයට ඊයේ පෙරවරුවේ මෙම සිද්ධිය සිදු වී ඇත. ඝාතනය සිදු වී ඇත්තේ බූස්ස අධිආරක්ෂිත බන්ධනාගාරයේ එකම සිරමැදිරියක රඳවා සිටි රැඳවියන් දෙදෙනෙකු අතර ඇති වූ ආරවුලක් හේතුවෙන් බව ප්‍රාථමික පරීක්ෂණවලින් අනාවරණය වී තිබේ.


"ඊයේ අළුයම එම රැඳවියා සිර මැදිරිය තුළ තුවාල ලබා වැටී සිටියදී සොයාගත් බවත්, අනතුරුව ඔහු බන්ධනාගාර රෝහලට ඇතුළත් කිරීමෙන් පසු මියගොස් තිබෙන බවත්" බන්ධනාගාර මාධ්‍ය ප්‍රකාශකවරයා පැවසීය.

පරීක්ෂණවලට අනුව, මියගිය රැඳවියාගේ සිරුරේ ස්ථාන 11ක පමණ උල් ආයුධයකින් ඇන තිබූ තුවාල හඳුනාගෙන ඇත. බරපතළ තුවාල ලැබූ රැඳවියා ගාල්ල කරාපිටිය ජාතික රෝහලට ඇතුළත් කරනවිටත් මියගොස් සිටි බව රෝහල් ආරංචි මාර්ග සඳහන් කරයි.

මියගිය නන්ද කුමාර ශිවනන්දන් නැමැති රැඳවියා හෙරොයින් ළඟ තබා ගැනීමේ චෝදනාවක් සම්බන්ධයෙන් රක්ෂිත බන්ධනාගාරගත කර තිබූ අයෙකු බව බන්ධනාගාර මාධ්‍ය ප්‍රකාශකවරයා තහවුරු කළේය. ඔහු මත්ද්‍රව්‍ය චෝදනාවක් සම්බන්ධයෙන් දැනට අවුරුදු තුනක පමණ කාලයක් රැඳවුම් භාරයේ සිටි බව වාර්තා වේ.

බන්ධනාගාර දෙපාර්තමේන්තු ආරංචි මාර්ග සඳහන් කරන ආකාරයට, මෙම සිද්ධියට අදාළ සැකකරු හඳුනාගෙන ඇති අතර, ඔහු දැනට සිරදඬුවම් විඳින රැඳවියෙකු බවට සැක කෙරේ.

මෙම ඝාතනය සම්බන්ධයෙන් විවිධ මට්ටම්වල විමර්ශන දැනට ක්‍රියාත්මක වෙමින් පවතී. ඊයේ (04) පස්වරුවේ ගාල්ල මහේස්ත්‍රාත්වරයා විසින් බූස්ස බන්ධනාගාර කඳවුරේදී ස්ථානීය මහේස්ත්‍රාත් පරීක්ෂණයක් සිදු කර ඇති බව වාර්තා වේ.
මියගිය රැඳවියාගේ මළ සිරුර පිළිබඳ පශ්චාත් මරණ පරීක්ෂණය අද (05) ගාල්ල, කරාපිටිය රෝහලේදී සිදු කිරීමට නියමිතය.

රත්ගම පොලිසිය සිද්ධිය සම්බන්ධව පරීක්ෂණ මෙහෙයවන අතර, ඝාතනයට හේතුව කුමක්ද යන්න සම්බන්ධයෙන් විවිධ කෝණවලින් විමර්ශන සිදු කරමින් සිටී. බන්ධනාගාර මාධ්‍ය ප්‍රකාශක ගාමිණී බී. දිසානායක මහතා පැවසූ පරිදි, සිද්ධිය සම්බන්ධයෙන් සිරමැදිරියේ සිටි සෙසු රැඳවියන්ගෙන් මේ වන විට ප්‍රකාශ සටහන් කරගනිමින් පවතී.

ඝාතනයට හේතුව කුමක්ද යන්න මේ වන තෙක් නිශ්චිත ලෙස අනාවරණය වී නොමැති නමුත්, එක් බන්ධනාගාර නිලධාරියෙකු සඳහන් කළ ආකාරයට, බන්ධනාගාර නිලධාරීන්ට ඔත්තු දුන්නේ යැයි සැකයක් මතද, නැතහොත් මත්ද්‍රව්‍ය ජාවාරම සම්බන්ධ ගැටලුවක් ඊට හේතුවී ඇත්ද යන සැකය මතද විමර්ශන ආරම්භ කර ඇත.

එසේම පසුගියදා බූස්ස බන්ධනාගාරයේ කරන ලද දැඩි සෝදිසි කිරීමේදී සොයාගෙන තිබුණු රවුටර් සහ ජංගම දුරකථන අතර මෙම ඝාතන සිද්ධියේ සම්බන්ධයක් ඇත්ද යන්න ද පරීක්ෂා කෙරෙමින් පවතී.



බූස්ස අධිආරක්ෂිත බන්ධනාගාරය තුළ මෙවැනි සිද්ධියක් සිදුවීම, බන්ධනාගාර ආරක්ෂාව පිළිබඳ ගැටලු ඇති කර තිබේ. අධිආරක්ෂිත බන්ධනාගාරයක් තුළ සිරකරුවන් උල් ආයුධ වැනි මාරාන්තික ආයුධ සොයාගන්නේ කෙසේද යන ප්‍රශ්නය මතුව ඇත.

මෙම සිද්ධිය සම්බන්ධයෙන් මානව හිමිකම් ක්‍රියාකාරිකයින් සහ නීති විශාරදයින් තම අදහස් දක්වමින්, බන්ධනාගාර තුළ සිරකරුවන්ගේ ආරක්ෂාව පිළිබඳව ගැටලු මතු කර ඇත. රැඳවියන් බන්ධනාගාර තුළ දී ද ඝාතනයට ලක්වීම බරපතළ තත්ත්වයක් බව ඔවුන් පෙන්වා දී ඇත.