ශ්‍රී ලංකා විදේශ අමාත්‍යාංශය විසින් දකුණු ඔස්ට්‍රේලියාව, ටස්මේනියාව සහ වික්ටෝරියා ප්‍රාන්තය සඳහා කොන්සල් ජනරාල්වරිය ලෙස පත් කරන ලද ප්‍රදීපා සේරම් මහත්මිය ඔස්ට්‍රේලියානු විදේශ කටයුතු සහ වෙළෙඳ දෙපාර්තමේන්තුවේ රාජ්‍ය අධ්‍යක්ෂ තිමති කේන් මහතා වෙත සිය කොමිෂන් පත්‍රය නිල වශයෙන් පිළිගන්වා ඇත.
විදේශ කටයුතු අමාත්‍යාංශයේ නිවේදනයකට අනුව, මෙම නිල මුණගැසීම මෙල්බන්හි පිහිටි වික්ටෝරියා ප්‍රාන්ත කාර්යාලයේදී පසුගියදා සිදු කර ඇත. අදාළ උත්සවයේදී ඔස්ට්‍රේලියානු රාජ්‍ය අධ්‍යක්ෂවරයා විසින් ශ්‍රී ලංකාවේ නව කොන්සල් ජනරාල්වරිය උණුසුම් ලෙස පිළිගෙන ඇති අතර, ඇයගේ පත්වීම වෙනුවෙන් සුබ පැතුම් ද පිරිනමා තිබේ.
මෙම හමුවේදී රටවල් දෙක අතර අන්‍යෝන්‍ය උනන්දුවක් දක්වන ක්ෂේත්‍ර කිහිපයක් සම්බන්ධයෙන් සාකච්ඡා පවත්වා ඇත. ඒ අතර ද්විපාර්ශ්වික සහයෝගීතාව තවදුරටත් ශක්තිමත් කිරීම, වෙළෙඳාම ප්‍රවර්ධනය කිරීම, ආයෝජන අවස්ථා පුළුල් කිරීම, සංචාරක ක්ෂේත්‍රය දියුණු කිරීම, ක්‍රීඩා සහ අධ්‍යාපන ක්ෂේත්‍රයන්හි සහයෝගිතාව වැඩි දියුණු කිරීම මෙන්ම දෙරට ජනතාව අතර පවතින සබඳතා තවදුරටත් වර්ධනය කිරීමේ අවශ්‍යතාවය ගැන විශේෂ අවධානයක් යොමු කර ඇත.
නව කොන්සල් ජනරාල්වරිය සිය කථාවේදී වික්ටෝරියා, දකුණු ඔස්ට්‍රේලියාව සහ ටස්මේනියා යන ප්‍රාන්තවල ජීවත්වන ශ්‍රී ලාංකික ප්‍රජාව සම්බන්ධයෙන් විශේෂ අවධානයක් යොමු කළ අතර, ශ්‍රී ලංකාව සහ ඔස්ට්‍රේලියාව අතර පවතින ද්විපාර්ශ්වික සබඳතා තවදුරටත් ශක්තිමත් කිරීම සඳහා එම ප්‍රජාව දක්වන අමිල දායකත්වය අගය කොට ඇත.
නිවේදනයේ සඳහන් වන පරිදි, වික්ටෝරියා ප්‍රාන්තය ඔස්ට්‍රේලියාවේ ජීවත් වන විශාලතම ශ්‍රී ලාංකික ප්‍රජාවගේ නිවහන වන අතර, මෙය ශ්‍රී ලංකාවෙන් පිටත ජීවත් වන විශාලතම ශ්‍රී ලාංකික ප්‍රජාවන්ගෙන් එකක් ලෙස ද සැලකේ.
වත්මන් කොන්සල් ජනරාල්වරියගේ නායකත්වය යටතේ මෙම ප්‍රදේශවල ශ්‍රී ලාංකික ප්‍රජාවගේ අවශ්‍යතා මෙන්ම වෙළෙඳ, ආයෝජන සහ සංචාරක ක්ෂේත්‍රවල සහයෝගීතාව තවදුරටත් පුළුල් කිරීම සඳහා ක්‍රියාමාර්ග ගැනීමට අපේක්ෂා කරන බව විදේශ කටයුතු අමාත්‍යාංශ නිවේදනය වැඩිදුරටත් සඳහන් කරයි.
Comments
Post a Comment
Your comment will be visible after approval