මර්වින් සිල්වා ඉඩම් නඩුවට සම්බන්ධ සිංගප්පූරු සරත් රිමාන්ඩ් භාරයට

කිරිබත්ගොඩ නගරයේ ඉදිකිරීම් සඳහා රජයට පවරාගත් ඉඩමකට අදාළව කූට ලේඛන සැකසීමේ චෝදනාවට ලක්ව සිටි තවත් ප්‍රධාන සැකකරුවෙකු වන දොන් සරත් කුමාර එදිරිසිංහ හෙවත් 'සිංගප්පූරු සරත්' නමින් හඳුන්වන පුද්ගලයා අපරාධ පරීක්ෂණ දෙපාර්තමේන්තුවේ නිලධාරීන් විසින් අත්අඩංගුවට ගෙන ඇත.

පසුගිය සිකුරාදා (අප්‍රේල් 04) පෙරවරුවේ කිරිබත්ගොඩ ප්‍රදේශයේ පිහිටි ඔහුගේ නිවසේදී සිදුකළ මෙම අත්අඩංගුවට ගැනීමෙන් අනතුරුව, එදිනම ඔහු මහර මහෙස්ත්‍රාත් අධිකරණයට ඉදිරිපත් කරන ලදී. අධිකරණය ඉදිරියේ කරුණු විභාගයෙන් පසු, මහර වැඩබලන මහෙස්ත්‍රාත් වසන්ත රාමනායක මහතා විසින් සැකකරු අප්‍රේල් මස 09 වන දින දක්වා රක්ෂිත බන්ධනාගාරගත කිරීමට නියෝග කරන ලදී.


විශේෂයෙන් සඳහන් කළ යුතු කරුණක් වන්නේ, මෙම සැකකරු දැනට රක්ෂිත බන්ධනාගාරගත කර සිටින හිටපු අමාත්‍ය මර්වින් සිල්වා මහතාගේ එවකට පාර්ලිමේන්තු කටයුතු ලේකම්වරයා ලෙස කටයුතු කර ඇති බවයි. මෙම නඩුවට අදාළව මේ වන විට හිටපු අමාත්‍ය මර්වින් සිල්වා, කැලණිය ප්‍රාදේශීය සභාවේ හිටපු උප සභාපති වෛද්‍ය ජයන්ත සිංහබාහු කබ්රාල් සහ නවීන් වීරකෝන් යන තිදෙනා රක්ෂිත බන්ධනාගාරගත කර ඇති අතර, හිටපු රාජ්‍ය අමාත්‍ය ප්‍රසන්න රණවීර සහ කැලණිය ප්‍රාදේශීය සභාවේ හිටපු මන්ත්‍රී මිල්ටෝයි පෙරේරා යන දෙදෙනා තවමත් පලාගොස් සැඟවී සිටින බව වාර්තා වේ.

අපරාධ පරීක්ෂණ දෙපාර්තමේන්තුවේ මූල්‍ය අපරාධ විමර්ශන අංශයේ නිලධාරීන් විසින් අධිකරණයට කරුණු දක්වමින්, "සැකකරු සොයමින් සිටින අතරතුර ලැබුණු තොරතුරකට අනුව කිරිබත්ගොඩ ප්‍රදේශයේ පිහිටි ඔහුගේ නිවසේදී අත්අඩංගුවට ගත් බවත්,
ඔහු අත්අඩංගුවට ගත්තේ පොදු දේපළ පනත යටතේ බවත්, තවමත් විමර්ශන කටයුතු අවසන් කර නොමැති බැවින් සැකකරු රක්ෂිත බන්ධනාගාරගත කරන ලෙස ඉල්ලා සිටින බවත්" ප්‍රකාශ කර ඇත.

සැකකරු වෙනුවෙන් පෙනී සිටි නීතිඥ දේශාල් පෝල් මහතා අධිකරණයට කරුණු දක්වමින්, "සැකකරු අධිකරණයට භාරවීම සඳහා සූදානම් වෙමින් සිටින අතරතුර අත්අඩංගුවට ගෙන ඇති බවත්, ඔහුගේ ව්‍යාපාරික කටයුතු අවසන් කර අධිකරණයට භාරවීමට සූදානම්ව සිටි බවත්, ඔහු අධිකරණයෙන් පැන ගොස් නොසිටි බවත්" අවධාරණය කර ඇත. එමෙන්ම, "සැකකරු දැඩි ලෙස අසනීප තත්ත්වයෙන් පසුවන බවත්, ඔහුට අවශ්‍ය ඖෂධ බන්ධනාගාර රෝහලේ නොමැති බැවින් ඒ පිළිබඳව අධිකරණයේ අවධානය යොමු කරන ලෙසත්" ඉල්ලා සිටියේය.

දෙපාර්ශවයෙන්ම ඉදිරිපත් කරන ලද කරුණු සලකා බැලූ වැඩබලන මහෙස්ත්‍රාත්වරයා, සැකකරු අප්‍රේල් මස 09 වන දින දක්වා රක්ෂිත බන්ධනාගාරගත කරන ලෙස නියෝග කරමින්,
ඔහුට අවශ්‍ය වෛද්‍ය පහසුකම් සැපයීමට බන්ධනාගාර බලධාරීන්ට නියෝග කර ඇත.

මෙම නඩුව කිරිබත්ගොඩ නගරයේ ඉදිකිරීම් සඳහා රජයට පවරාගත් ඉඩමක් සම්බන්ධයෙන් කූට ලේඛන සකස් කිරීමට අදාළව පවතින අතර, මෙම සිද්ධියට සම්බන්ධ බවට සැක කරන තවත් පුද්ගලයන් කිහිප දෙනෙකු තවමත් නීතියේ රැහැනින් පිටත සිටින බව පොලිස් මූලාශ්‍ර සඳහන් කරයි.