ඔන්ලයින් පනත අවලංගු කිරීමට නව පනත් කෙටුම්පතක් ගැසට් කරයි

මාර්ගගත ක්‍රමවල සුරක්ෂිතභාවය පිළිබඳ පවතින පනත අවලංගු කිරීම සඳහා නව පනත් කෙටුම්පතක් ගැසට් නිවේදනයක් මගින් ප්‍රකාශයට පත් කර ඇත. මෙම නව පනත් කෙටුම්පත සම්මත වීමෙන් අනතුරුව 2024 අංක 9 දරන මාර්ගගත ක්‍රමවල සුරක්ෂිතභාවය පිළිබඳ පනත සම්පූර්ණයෙන්ම අවලංගු වනු ඇති බවත්, එම පනත යටතේ සකස් කර ඇති සියලුම රෙගුලාසි ද අහෝසි වනු ඇති බවත් ගැසට් නිවේදනයේ සඳහන් කර තිබේ.

වත්මන් පනත වන 2024 අංක 9 දරන මාර්ගගත ක්‍රමවල සුරක්ෂිතභාවය පිළිබඳ පනත් කෙටුම්පත පසුගිය වසරේ ජනවාරි 24 වන දින පාර්ලිමේන්තුවේදී වැඩි ඡන්දයෙන් සම්මත කරන ලදී. එම පනත දැන් අවලංගු කිරීමට යෝජිත අතර, ඒ සඳහා නව පනත් කෙටුම්පතක් රජය විසින් ගැසට් කර ඇත.


රාජපක්ෂ පාලනයට එරෙහිව 2022 ජනතා අරගලයට හා ඉන් පසු පැවති රාජපක්ෂ හිතෛෂීන් ආරක්ෂා කිරීමේ රජයට සමාජ මාධ්‍ය හරහා එල්ලවූ අවාසි සහගත තත්වය මෙල්ල කිරීමේ අටියෙන් හා මැතිවරණ කාලසීමාවන්හි ඇතිවිය හැකි පසුබෑම් අවම කිරීමේ අරමුණින් 'ඔන්ලයින් පනත' කඩිමුඩියේ 2024 සම්මත කරන ලද්දේ විවිධ අයගේ විරෝධතා මැදයි. මාර්ගගත ගැටලු සම්බන්ධයෙන් ෆේස් බුක් ගූගල් ඇපල් ඇතුළු ප්‍රධාන සන්නාම නියෝජනය කරන ජාත්‍යන්තර සංවිධාන පවා මෙම ක්‍රමවේදය විවේචනයට ලක් කළ අතර මෙය මාර්ග ගත පරිශීලකයින් ආරක්ෂා කිරීමට වටා දේශපාලකයින් ආරක්ෂා කිරීමේ අරමුණින් ලේඛන ගත කරන ලද්දක් බව පෙන්වාදී තිබුණි.

මෙම නව පනත් කෙටුම්පත සඳහා පාර්ලිමේන්තුවේ අනුමැතිය ලැබුණු පසුව, පවතින පනත සහ ඊට අදාල සියලුම රෙගුලාසි නීතිමය වශයෙන් අහෝසි වනු ඇත. මෙය රටේ මාර්ගගත ක්‍රමවල සුරක්ෂිතභාවය සම්බන්ධයෙන් වැදගත් වෙනස්කමක් සිදු කිරීමට යෝජිත පියවරක් ලෙස සැලකිය හැකිය.


මාර්ගගත ක්‍රමවල සුරක්ෂිතභාවය පිළිබඳ පනත අවලංගු කිරීමට රජය තීරණය කිරීමේ පසුබිම් හෝ හේතු ගැසට් නිවේදනයේ සඳහන් කර නොතිබුණද, මෙම වෙනස්කම දිගින් දිගටම අධීක්ෂණය කිරීම වැදගත් වනු ඇත.

මාර්ගගත ක්‍රමවල සුරක්ෂිතභාවය සහතික කිරීම සඳහා නව නීති රාමුවක් හඳුන්වාදීමට රජය සැලසුම් කරන්නේද, නැතහොත් මෙම ක්ෂේත්‍රය නියාමනය කිරීමේ ප්‍රවේශය සම්පූර්ණයෙන්ම වෙනස් කිරීමට අදහස් කරන්නේද යන්න පිළිබඳව තවත් තොරතුරු අවශ්‍ය වනු ඇත.

තොරතුරු තාක්ෂණය හා මාර්ගගත ආරක්ෂාව පිළිබඳ විශේෂඥයින් මෙම වෙනස්කම පිළිබඳව සිය අදහස් හා නිරීක්ෂණ ඉදිරියේදී ප්‍රකාශ කරනු ඇතැයි අපේක්ෂා කෙරේ.