වැල්ලම්පිටිය ප්‍රදේශයේදී සිදුවූ වෙඩි තැබීමෙන් ඩෑන් ප්‍රියසාද් රෝහල්ගත කොට අසාධ්‍ය තත්වයේ ප්‍රතිකාර ලබමින් සිට අවසානයේ මියගොස් ඇත. ඩෑන් ප්‍රියසාද් කොළොන්නාව නගර සභාවේ මීතොටමුල්ල කොට්ඨාශයෙන් ශ්‍රී ලංකා පොදුජන පෙරමුණේ පළාත් පාලන මැතිවරණයට ඉදිරිපත් වූ අපේක්ෂකයෙකු බවද පැවසිණි.
පොලිස් මාධ්‍ය ප්‍රකාශකවරයා විසින් දැනුම් දෙනු ලැබූ පරිදි, මෙම සිද්ධිය ඊයේ (22) රාත්‍රී 9:10ට පමණ වැල්ලම්පිටිය ලක්සඳ සෙවණ මහල් නිවාස සංකීර්ණයේ උඩු මහලකදී සිදුව ඇත.
මුලදී පොලිස් මාධ්‍ය ප්‍රකාශක කාර්යාලය විසින් එම වෙඩි තැබීමෙන් ඔහු මරණයට පත් වූ බව නිවේදනය කරන ලද අතර, ඩෑන් ප්‍රියසාද්ගේ සිරුර මෘත ශරීරාගාරයේ තිබෙන බවත් ප්‍රකාශ කර තිබිණි. කෙසේ වෙතත්, කොළඹ ජාතික රෝහලේ ආරංචිමාර්ග විසින් සඳහන් කර ඇත්තේ එම නිවේදනය සකස් කරන අවස්ථාවේදීත් ඩෑන් ප්‍රියසාද් ජීවිතය සමඟ පොරබදමින් දැඩි සත්කාර ඒකකයේ සිටි බවයි. එම අවස්ථාවේදී ඔහු මියගොස් නොතිබුණි.
යතුරුපැදියකින් පැමිණි පුද්ගලයින් දෙදෙනෙකු විසින් වෙඩි තැබීම සිදුකර පලාගොස් ඇත. වෙඩි තැබීම සිදුවන අවස්ථාවේදී ඔහු මත්පැන් පානය කරමින් සිට ඇති බව වාර්තා වී තිබේ.
මූලික විමර්ශනවලදී අනාවරණය වී ඇත්තේ පිස්තෝල වර්ගයේ ගිනි අවියක් යොදා ගනිමින් මෙම වෙඩි තැබීම සිදුකර ඇති බවයි.
වෙඩි වැදීමෙන් තුවාල ලැබූ ඩෑන් ප්‍රියසාද් කොළඹ ජාතික රෝහලට ඇතුළත් කරන ලදී. වෙඩි ප්‍රහාර දෙකක් ඔහුගේ උරහිස ප්‍රදේශයට සහ තවත් වෙඩි ප්‍රහාර දෙකක් ඔහුගේ පපුව ප්‍රදේශයට එල්ල වී තිබූ බව රෝහල් ප්‍රකාශකයෙකු පවසා ඇත. මෙම සිද්ධියෙන් තවත් පුද්ගලයෙකු සුළු තුවාල ලබා රෝහල්ගත කර ඇති බවද වාර්තා වී තිබේ.
ඩෑන් ප්‍රියසාද් සිංහලේ ජාතික සංවිධානයේ සමාරම්භක නායකයෙකු ලෙස කටයුතු කර ඇත. ඔහු ඇතුළු තරුණයන්ගේ සහභාගීත්වයෙන් සංවිධානය වූ සිංහල ජාතික සංවිධාන රැසක් 2016 පමණ කාලයේ සිට දැඩි මුස්ලිම් විරෝධයකින් බලහත්කාරී ලෙස කටයුතු කිරීමේ ප්‍රවණතාවක් පෙන්නුම් කර ඇත. මෙම සංවිධාන ව්‍යාජ තොරතුරු හුවමාරු කරමින්, තරුණ පරම්පරාව බියෙන් උසිගන්වමින් ප්‍රචණ්ඩක්‍රියා වෙත යොමු කිරීමට කටයුතු කර ඇති අතර, ඔවුන් විසින් දේශද්‍රෝහී ලෙස හැඳින්වූ පුද්ගලයන්ට එරෙහිව සංවිධානාත්මකව ක්‍රියාත්මක වී ඇත. ඇතැම් අවස්ථාවල මැර කණ්ඩායම් ලෙසද ඔවුන් ක්‍රියා කර ඇති බව වාර්තා වේ.
මෙවැනි ජාතිකවාදී සංවිධාන බුද්ධි අංශ සමඟ සම්බන්ධතා පැවැත්වූ බවටද තොරතුරු ඇත. 2017 වර්ෂයේදී රොහිංග්‍යා සරණාගතයන් සිටින ස්ථානයකට කඩා වැදීම ඇතුළු ස්ථාන කිහිපයකට කඩා වැදීමට ඩෑන් ප්‍රියසාද්ට එරෙහිව නඩු පැවරී තිබුණද,
ඔහු විසින් සිදු කර ඇති ප්‍රකාශ සහ ක්‍රියාකාරකම්වලට අදාලව සිවිල් හා දේශපාලන අයිතිවාසිකම් පිළිබඳ ජාත්‍යන්තර සම්මුති පනත වැනි පනත් කිසි විටෙකත් යොදාගෙන නොතිබුණි.
2022 මැයි 9 වැනි දින ගෝල්ෆේස් අරගලයට කඩා වැදී සාමකාමී අරගලකරුවන්ට පහරදීමට උත්සාහ කළ අවස්ථාවේ ඩෑන් ප්‍රියසාද් එයට සම්බන්ධ වී ඇත. ගෝල්ෆේස් අරගලයේ මුල් දිනවල සිටම ඔහු ඇතුළු පිරිසක් එයට එරෙහිව ක්‍රියා කිරීමට උත්සාහ ගත් බවට තොරතුරු තිබුණි. සාමකාමී අරගලයට පහරදීමට ඔවුන් ගත් උත්සාහය ව්‍යර්ථ වූයේ ජනතාව ඔවුන්ගේ හිංසනයට ඔවුන්ගේම භාෂාවෙන් ප්‍රතිචාර දක්වා තිබූ නිසා බව පැවසේ.
මීට පෙර 2025 ජනවාරි මාසයේදී ඩෑන් ප්‍රියසාද් මිය ගොස් බවට ව්‍යාජ පුවත් පළ වී තිබුණි. එයින් පසුව ඔහු ඩුබායි සිට ශ්‍රී ලංකාවට පැමිණි අතර, අධිකරණයටද ඉදිරිපත් කරන ලදී. ඩෑන් මෙරට හමුදා බුද්ධි අංශ, ජාතිකවාදී දේශපාලන කණ්ඩායම් සහ විවිධ ජාතිවාදී මැර ක්‍රියා පිළිබඳ බොහෝ තොරතුරු දැන සිටි අයෙකු බව ප්‍රකටය.
මෙම සිද්ධිය සම්බන්ධයෙන් පොලිසිය විශේෂ විමර්ශනයක් ආරම්භ කර ඇති අතර, සැකකරුවන් අත්අඩංගුවට ගැනීමට දැඩි උත්සාහයක් දරමින් සිටින බව වාර්තා වේ. මෙම වෙඩි තැබීම පිටුපස ඇති හේතු තවමත් පැහැදිලි කර නොමැති අතර, එය පෞද්ගලික ආරවුලක් හෝ දේශපාලන හේතුවක් විය හැකි බවට විමර්ශකයින් සැක කරති.
ඩෑන් ප්‍රියසාද්ගේ අවමංගල්‍ය කටයුතු පිළිබඳ තොරතුරු තවමත් නිල වශයෙන් නිකුත් කර නොමැත. ඔහුගේ මරණය සම්බන්ධයෙන් තවදුරටත් පරීක්ෂණ පැවැත්වෙන අතර, අදාළ පුද්ගලයින් විසින් ලබා දෙන තොරතුරු මත පදනම්ව විමර්ශන කටයුතු සිදු කෙරෙනු ඇත.
ඩෑන් ප්‍රියසාද්ගේ මරණය සම්බන්ධයෙන් ශ්‍රී ලංකා පොදුජන පෙරමුණ හෝ අනෙකුත් දේශපාලන පක්ෂ විසින් තවමත් නිල ප්‍රකාශයක් නිකුත් කර නොමැත. ප්‍රචණ්ඩත්වය සහ අන්තවාදී ක්‍රියාකාරකම් සම්බන්ධයෙන් ජාතික මට්ටමේ සංවාදයක් ඇති වී ඇති අතර, අදාළ නීති ක්‍රියාත්මක කිරීමේ අවශ්‍යතාවය ගැන විශේෂඥයින් අවධාරණය කරති.
මෙම සිද්ධිය සම්බන්ධයෙන් ඉදිරියේදී ලැබෙන තොරතුරු අනුව තවදුරටත් වාර්තා කෙරෙනු ඇත.
සිද්ධියට සම්බන්ධ පෙර පුවත්
මීතොටමුල්ලලේදි ඩෑන් ප්‍රියසාද්ට වෙඩි ප්‍රහාරයක්
Update: ඩෑන් ප්‍රියසාද්ගේ පැටිකිරිය
Comments
Post a Comment
Your comment will be visible after approval